Il pachet Svizra-UE

La Svizra ha negozià in pachet da cunvegnas cun l’Uniun europeica (UE) che duai stabilisar e sviluppar vinavant las relaziuns bilateralas. Sin questa pagina chattais Vus infurmaziuns davart il pachet Svizra-UE (Bilateralas III).

© BK

Ils 13 da mars 2026 ha il Cussegl federal approvà il pachet Svizra-UE per mauns dal parlament. Sper las cunvegnas cumpiglia il pachet er las leschas che permettan la realisaziun da las cunvegnas en Svizra, inclusiv las mesiras accumpagnantas.

Il pachet vegn ussa discutà en il parlament. Sch’i dat in referendum, va er la populaziun a l’urna.

Videos explicativs

• 1. Pertge quest pachet?

  📦La Svizra e la UE han negozià in nov pachet da contracts. Pertge dovri quel insumma? Ils contracts actuals han passa 20 onns. In’actualisaziun è damai necessaria.

  🔄 Las cunvegnas existentas davart l’access al martgà intern da las Bilateralas I èn vegnidas actualisadas e trais novas cunvegnas èn vegnidas negoziadas (electricitad, sanadad, segirezza da victualias).

  🤝Il Cussegl federal beneventa il pachet negozià, perquai ch’el meglierescha la segirezza, il bainstar e las schanzas da la populaziun svizra. Il pachet da contracts Svizra-UE permetta da stabilisar e da sviluppar vinavant la via bilaterala cumprovada cun la UE.

  Maletgs d’archiv: © SRF/Telepool GmbH

• 2. Tge è en il pachet?

  🤝 La Svizra e la UE han negozià in nov pachet da contracts. Tge cuntegna quel? Il pachet na cumpiglia betg mo cunvegnas, mabain er mesiras concretas per lur realisaziun en Svizra – cun mesiras accumpagnantas sche necessari.

  📦Il pachet ha duas parts: Ina part duai stabilisar la via bilaterala. La finamira è da mantegnair las cunvegnas existentas e da reglar en moda persistenta l’access a programs europeics e la contribuziun da la Svizra a la UE.

  🔌⚕️🥕 L’autra part duai sviluppar vinavant la via bilaterala cun trais novas cunvegnas davart l’electricitad, la sanadad e la segirezza da victualias.

Dapli videos ed explicaziuns davart il pachet Svizra-UE èn disponibels sin la pagina da la Chanzlia federala en tudestg, franzos e talian.

Ulteriuras infurmaziuns

• Tut ils documents davart il pachet Svizra-UE èn disponibels sin la pagina d’internet dal DFAE, en tudestg, franzos e talian.