Las set commembras e commembers dal Cussegl federal
La regenza svizra consista da las set commembras e commembers dal Cussegl federal. La presidenta u il president da la Confederaziun è elegì mo per in onn e vala durant quest temp sco "primus inter pares", quai vul dir sco emprim tranter talas e tals da medema posiziun.
Viola Amherd (Center/VS) è cussegliera federala dapi l'onn 2019. Ella maina il Departament federal da defensiun, protecziun da la populaziun e sport (DDPS).
Karin Keller-Sutter (PLD/SG) è cussegliera federala dapi l'onn 2019. Dapi l'onn 2023 maina ella il Departament federal da finanzas (DFF). Avant ha dunna Keller-Sutter manà il Departament federal da giustia e polizia (DFGP).
Albert Rösti (PPS/BE) è cusseglier federal dapi l'onn 2023. Signur Rösti maina il Departament federal per ambient, traffic, energia e communicaziun (DATEC).
Guy Parmelin (PPS/VD) è cusseglier federal dapi l'onn 2016. El maina il Departament federal d'economia, furmaziun e retschertga (DEFR). Da l'onn 2016 fin l'onn 2018 ha signur Parmelin manà il Departament federal da la defensiun, protecziun da la populaziun e sport (DDPS).
Elisabeth Baume-Schneider (PS/JU) è cussegliera federala dapi l'onn 2023. Dapi l'onn 2024 ella maina il Departament federal da l'intern (DFI). Avant ha dunna Baume-Schneider manà il Departament federal da giustia e polizia (DFGP).
