President da la Confederaziun 2026 Guy Parmelin
Guy Parmelin (PPS/VD) è cusseglier federal dapi l'onn 2016. El maina il Departament federal d'economia, furmaziun e retschertga (DEFR). Da l'onn 2016 fin l'onn 2018 ha signur Parmelin manà il Departament federal da la defensiun, protecziun da la populaziun e sport (DDPS).
Il cusseglier federal Guy Parmelin
Guy Parmelin è naschì ils 9 da november 1959 a Bursins (VD). El ha fatg ina matura federala (latin-englais). Suenter ses emprendissadi sco pur ha el survegnì l'onn 1979 il diplom da la scola d'agricultura a Marcelin. L'onn 1985 ha el survegnì il certificat professiunal federal sco mainagestiun en viticultura. Guy Parmelin è maridà.
L'onn 1993 è Guy Parmelin entrà en la politica sco president dal cussegl d'abitantas e d'abitants da Bursins. Dals onns 1994 fin 2003 è el stà commember dal cussegl grond dal chantun Vad. Dals onns 2000 fin 2004 ha el presidià la PPS vadaisa. L'onn 2003 è el vegnì elegì da las votantas e dals votants dal chantun Vad en il Cussegl naziunal.
Fin a sia elecziun ha el manà sco cumpossessur in manaschi agricul ed in bain da viticultura ed è stà vicepresident dal cussegl d'administraziun da la gruppa d'interpresas da l'economia agrara svizra (FENACO) e commember dal cussegl d'administraziun da l'assicuranza d'edifizis dal chantun Vad.
Elecziun en il Cussegl federal
Ils 9 da december 2015 ha l'Assamblea federala plenara elegì Guy Parmelin en il Cussegl federal. Dapi il schaner 2016 fin il december 2018 ha el dirigì il Departament federal da defensiun, protecziun da la populaziun e sport (DDPS). Dapi il schaner 2019 maina el il DEFR. L'onn 2021 è el stà per l’emprima giada president da la Confederaziun.
Il president da la Confederaziun Guy Parmelin
L’onn 2026 n’è Guy Parmelin betg mo il schef dal DEFR, mabain er il president da la Confederaziun. Quest uffizi cumpiglia oravant tut duairs da represchentaziun. Ultra da quai è Parmelin en il Cussegl federal «primus inter pares», quai vul dir l’emprim tranter las collegas ed ils collegas cun la medema posiziun.
Il Departament federal d'economia, furmaziun e retschertga (DEFR)
En il DEFR sa tracti per l'ina da dumondas da l'economia e da la politica da commerzi. Tar quest sectur tutga er la politica agrara. Per l'autra stattan ils secturs furmaziun, perscrutaziun ed innovaziun en il focus. Ultra da quai s’occupa il DEFR tranter auter er dals fatgs d'abitaziuns.
Cifras pertutgant il DEFR
Plazzas a temp cumplain (2024): 2268
Tenor il preventiv quinta il DEFR per l'onn 2024 cun custs dad 12,85 milliardas francs.