Elisabeth Baume-Schneider
Elisabeth Baume-Schneider (PS/JU) è cussegliera federala dapi l'onn 2023. Dapi l'onn 2024 maina ella il Departament federal da l'intern (DFI). Avant ha dunna Baume-Schneider manà il Departament federal da giustia e polizia (DFGP).
Cussegliera federala Elisabeth Baume-Schneider
Elisabeth Baume-Schneider è naschida l'onn 1963 ed è creschida si a Les Bois (JU). Suenter la maturitad ha ella studegià sociologia, scienzas economicas e politologia a l'Universitad da Neuchâtel.
Ella ha lavurà en il sectur da la lavur sociala ed ha manà la Scola auta da lavur sociala e sanadad (HETSL) a Losanna. Ella è s'engaschada en differentas uniuns e fundaziuns. Elisabeth Baume-Schneider è maridada ed ha dus uffants creschids.
Elisabeth Baume-Schneider ha lavurà en differentas funcziuns per la PS dal chantun Giura. Ils onns 1995 fin 2002 è ella stada commembra dal Parlament chantunal, l'onn 2000 sco presidenta. Suenter sia elecziun en la Regenza chantunala l'onn 2003 è ella stada fin l'onn 2015 scheffa dal Departament d'educaziun, cultura e sport. Ils onns 2006, 2008 e 2012 è ella stada presidenta da la Regenza. Dapi la fin da l'onn 2019 ha ella represchentà il chantun Giura en il Cussegl dals chantuns.
Elecziun en il Cussegl federal
L'Assamblea federala ha elegì Elisabeth Baume-Schneider ils 7 da december 2022 en il Cussegl federal. L'onn 2023 ha el manà il Departament federal da giustia e polizia (DGP). Dapi il schaner 2024 dirigia el il DFI.
Il Departament federal da l'intern (DFI)
Il DFI è in departament fitg varià. Sut ses tetg èn reunids secturs zunt differents sco las assicuranzas socialas, ils fatgs da sanadad, la statistica u l'egualitad da las schlattainas. Latiers vegnan ils secturs da la cultura e da l'aura, pia la meteorologia. Actualmain èn centralas per il DFI cunzunt la prevenziun per la vegliadetgna ed ils fatgs da sanadad.
Cifras pertutgant il DFI
- Plazzas a temp cumplain (2024): 2809
- Tenor il preventiv quinta il DFI per l'onn 2024 cun custs da 20,98 milliardas francs.