Martin Pfister
Martin Pfister (Center/ZG) è cusseglier federal dapi l'onn 2025. El maina il Departament federal da defensiun, protecziun da la populaziun e sport (DDPS).
Cusseglier federal Martin Pfister
Martin Pfister è naschì l’onn 1963 ed è creschì si a Zug ed ad Allenwinden (ZG). El ha absolvì la scolaziun da scolast primar al Seminari scolastic St. Michael a Zug. Suenter ha el studegià istorgia e germanistica a l’Universitad da Friburg ed ha terminà ses studi cun il licenziat.
Martin Pfister ha lavurà, tranter auter, sco magister e sco collavuratur scientific. El è stà cussegliader per associaziuns e per organisaziuns senza finamira da profit. En l’armada ha Pfister cuntanschì il grad da colonel ed el è stà schef da l’agid en cas da catastrofas da la regiun territoriala 3. Martin Pfister è maridà ed ha quatter uffants creschids.
Martin Pfister ha cumenzà sia carriera politica l’onn 2003 sco commember da la cumissiun tutelara e d’agid social da la vischnanca da Baar. L’onn 2006 è el vegnì elegì en il Cussegl grond da Zug. Silsuenter è el daventà schef da fracziun e lura president da la PCD chantunala (oz «Il Center»). Dapi l’onn 2016 è el stà cusseglier guvernativ da Zug.
Elecziun en il Cussegl federal
Ils 12 da mars 2025 ha l’Assamblea federala plenara elegì Martin Pfister en il Cussegl federal. El maina dapi il 1. d’avrigl 2025 il DDPS.
Il Departament federal da defensiun, protecziun da la populaziun e sport (DDPS)
Sch'ins discurra dal DDPS, pensan blers l'emprim a l'armada. Ma er en il sectur civil ha il departament incumbensas impurtantas per la segirezza da la Svizra e da sia populaziun. Dal DDPS fan part er ils secturs protecziun da la populaziun, il Servetsch d'infurmaziun da la Confederaziun, l'Uffizi federal da topografia swisstopo sco er armasuisse, il Center da cumpetenzas da la Confederaziun per l'acquisiziun da tecnologia cumplexa. Ultra da quai cumpiglia la gronda diversitad tematica dal DDPS er la promoziun dal sport da massa e da prestaziun.
Cifras pertutgant il DDPS
- Plazzas a temp cumplain (2024): 12'279
- Tenor il preventiv quinta il DDPS per l'onn 2024 cun custs da 6,45 milliardas francs.