Onn presidial 2026

President da la Confederaziun 2026 è il Vadais Guy Parmelin. El è vegnì elegì per quest uffizi ils 10 da december 2025.

Il Departament federal d'economia, furmaziun e retschertga (DEFR) ha l’onn 2026 la funcziun da departament presidial. Ina rolla ch’el ha gì l’ultima giada l’onn presidial 2021.

Vicepresident dal Cussegl federal per l’onn 2026 è Ignazio Cassis. El maina il Departament federal d'affars exteriurs (DFAE).

Amar ses pajais na munta betg mo d’avair plaschair da ses success, mabain er d’esser bun d’explitgar sias terradas – sch’i dat quellas – e da far tuttina il meglier ordlonder.
N’ans laschain betg divider. Nizzegiain nossa diversitad per esser ensemen pli ferms. L’avegnir da noss pajais na nascha betg, sche nus agin in cunter l’auter ma sche nus essan unids.
Or dal pled dal cusseglier federal Guy Parmelin dals 10 da december 2025 davant l'Assamblea federala plenara
Pled d’acceptaziun da l’elecziun

Ils pleds dal president da la Confederaziun vegnan publitgads sin la pagina d’internet dal Departament federal d'economia, furmaziun e retschertga (DEFR).

Servetsch presidial

Dapi il cumenzament da l'onn 2015 stat a disposiziun al departament presidial in servetsch presidial ch'è affilià a la Chanzlia federala. Quest servetsch presidial è vegnì installà sin basa d'in conclus dal parlament dals 28 da settember 2012. La basa legala furma la Lescha davart l'organisaziun da la regenza e da l'administraziun (LORA).

Quest servetsch che sustegna il departament presidial tar las incumbensas che vegnan chaschunadas supplementarmain durant l'onn presidial concentrescha en spezial las prestaziuns che la Chanzlia federala (ChF) furnescha dapi in temp pli lung e talas dal Departament federal d'affars exteriurs (DFAE). L'incumbensa centrala dal servetsch presidial è quella da cussegliar la presidenta u il president da la Confederaziun en dumondas da la politica exteriura.

Ina tala cussegliaziun devi gia pli baud; ella vegniva fatga dal sectur «Fatschentas presidialas» dal Secretariat da stadi. Anc pli baud vegniva delegà in diplomat en il departament presidial. Il parlament e la regenza spetgan dal servetsch presidial ch'i sa laschian concentrar là experientscha, enconuschientschas spezialas e contacts per installar uschia ina memoria instituziunala – en il senn da la cuntinuitad, ma er da l'effizienza.