2018 - Pled da Bumaun dal president da la Confederaziun Alain Berset
Stimadas dunnas e stimads signurs
Jau sper che Vus hajas passentà bellas festas da Nadal ed As giavisch tut il bun per l'onn nov.
Forsa As vai sco a mai: Jau sun engraziaivel da pudair viver en quest pajais.
Nus dastgain guardar cun confidenza envers quest onn:
La Svizra è stabla e segira. Nossa economia marscha, nus essan autamain innovativs.
A noss pajais vai bain. E nus stain bain en quest pajais.
Tuttina sa tschentan blers e bleras er dumondas davart lur avegnir persunal:
Quant segira è mia plazza da lavur? Hai jau avunda daners per viver, cura che jau sun vegl? Co poss jau metter famiglia e professiun sut in tetg?
I na dat nagin motiv da far il pugn en giaglioffa.
Pertge che nus tuts pudain contribuir a la decisiun, co che nus vulain viver.
Quai è in grond privilegi.
Contribuir a la decisiun vul dir prender part a la discussiun.
Er en la stanza da sesida dal Cussegl federal discutain nus vivamain. Er qua collideschan mintgatant interess e valurs in cun l'auter.
Ma noss pajais funcziuna fitg bain:
perquai che nus permettain als auters, che er els vulan il meglier per noss pajais.
Nus vegnin a manar discussiuns intensivas quest onn.
pertutgant la segirtad da nossas rentas, davart nossas relaziuns cun l'Europa, noss partenari commerzial il pli impurtant, concernent la giustia fiscala, il clima, ni areguard l'egualitad tranter dunna ed um.
La finamira è adina il bainstar general, che tuttas e tuts hajan ina buna vita.
La Svizra è adina stada ferma, cura ch'ella ha prendì a maun activamain sias sfidas.
Nus savain, quant impurtant che quai è da s'avischinar in a l'auter – e da far cumpromiss.
Savens dovra quai dapli curaschi che d'insister rigurusamain sin l'atgna vista.
Nus avain adina puspè demussà che quai ch’ ans unescha è pli ferm che quai ch’ ans separa.
E nus avain emprendì en il decurs da l'istorgia: Tgi che rinforza las minoritads, rinforza er la Svizra.
Jau giavisch a Vus ed a Voss proxims ventira, sanadad e da cor tut il bun en l'onn nov.