Midada da la Lescha federala davart il servetsch civil
Il 14 da zercladur 2026 vegn la populaziun a votar davart la midada da la Lescha federala davart il servetsch civil.
La midada da lescha en furma concisa
Tgi che na po betg metter d’accord il servetsch militar cun sia conscienza, ha la pussaivladad da prestar servetsch civil. Per pudair far quai èsi d’inoltrar ina dumonda. Fin l’onn 2009 examinava ina cumissiun d’admissiun, sch’il conflict da conscienza saja vardaivel. Dapi lura cumprovan ils petents lur conflict da conscienza cun lur prontezza da far 1,5 giadas uschè blers dis servetsch civil, sco quai ch’els stuessan anc far en il militar.
Il Cussegl federal ed il parlament vulan garantir, ch’il servetsch civil restia in’excepziun. Il project duai reducir il dumber da persunas che midan en il servetsch civil. En mira ha el cunzunt ils schuldads che vulan midar en il servetsch civil pir, suenter ch’els han gia fatg ina gronda part da lur servetsch militar. Questas persunas ston numnadamain far oz mo pli relativamain paucs dis da servetsch supplementars. Da nov ston tut las persunas ch’èn obligadas da far servetsch civil prestar almain 150 dis da servetsch. Ulteriuras mesiras prevesan prescripziuns pli rigurusas per la planisaziun dals engaschaments da servetsch civil. Uschia duai vegnir impedì, che las persunas ch’èn obligadas da far servetsch civil hajan avantatgs envers las persunas ch’èn obligadas da far servetsch militar. Cunter quest project èsi vegnì fatg in referendum. Pervia da quai datti ina votaziun.
Dumonda da votaziun
Vulais Vus acceptar la midada dals 26 da settember 2025 da la Lescha federala davart il servetsch civil (LSCi)?
Recumandaziun dal Cussegl federal e dal parlament
Recumandaziun dal comité da referendum
La votaziun dal parlament
Explicaziuns dal Cussegl federal
La Chanzlia federala ha adattà la versiun electronica da las explicaziuns da votaziun. Sin pagina 28, en la terza frasa da la part «Svelt engaschament suenter l’admissiun», èn vegnids stritgads dus pleds. La frasa respectiva sa cloma ussa: «Tgi che inoltrescha la dumonda da far servetsch civil durant la scola da recrut, sto da nov absolver l’engaschament lung gia durant l’onn suenter l’admissiun.» (guardar la communicaziun a las medias dals 5 da matg 2026)
