Lescha davart il material da guerra

Il 29 da november 2026, vegn la popolaziun a votar davart la midada da la Lescha davart il material da guerra.

Il project en furma concisa

La Lescha davart il material da guerra definescha, sut tge premissas che armas, sistems d’armas e parts d’armas dastgan vegnir exportads. L’export na vegn per exempel betg autorisà, sch’il stadi da destinaziun è involvì en in conflict armà u violescha dretgs umans. L’export è er exclus, sch’ins sto temair, ch’il material vegnia duvrà cunter la populaziun civila u dà vinavant illegalmain.

L’offensiva da la Russia cunter l’Ucraina ha pegiurà fermamain la situaziun da segirezza en l’Europa. Per ch’il Cussegl federal possia reagir adequatamain sin las novas sfidas, ha il parlament concludì d’adattar las cundiziuns per exportar material da guerra. Sche quai è cumpatibel cun la neutralitad, cun ils interess da la politica exteriura u da segirezza, dastga material da guerra da nov vegnir furnì ad in stadi partenari ch’è involvì en in conflict armà. Da nov po il Cussegl federal er divergiar dals criteris d’autorisaziun, sch’igl èn avant maun circumstanzas extraordinarias e sche quai è necessari per defender ils interess da la Svizra. Ils stadis che cumpran material da guerra da la Svizra, na ston plinavant betg pli garantir en mintga cas, ch’els dettian vinavant quest material mo cun il consentiment da la Svizra ad auters pajais. Er vinavant ston las permissiuns adina esser cumpatiblas cun il dretg da neutralitad, ils dretgs umans ed autras obligaziuns internaziunalas. Cunter questas midadas èsi vegnì fatg in referendum. Perquai vegn il project suttamess a la votaziun dal pievel.

Dumonda da votaziun

Vulais Vus acceptar la midada dals 19 da december 2025 da la Lescha federala davart il material da guerra (LMG)?

Recumandaziun dal Cussegl federal e dal parlament

Cun las adattaziuns previsas vulan il Cussegl federal ed il parlament procurar, che la Svizra possia exportar material da guerra a stadis partenaris e mantegnair ina industria d’armament cumpetitiva en Svizra. Quai è ina premissa, per che la Svizra neutrala possia sa defender en cas d’ina attatga.

Recumandaziun dal comité da referendum

Tenor il comité èsi pussaivel – tras la schluccada da la Lescha davart il material da guerra – da vender u dar vinavant armas svizras a stadis arbitrars. Uschia creschia il privel cleramain, ch’ellas arrivan en ils mauns da gruppas terroristicas e vegnan duvradas en guerras. La midada da la lescha donnegeschia massivamain la segirezza e la neutralitad da la Svizra.