Iniziativa da neutralitad

Il 27 da settember 2026, vegn la populazion a votar davart l'iniziativa dal pievel «Mantegnair la neutralitad svizra (Iniziativa da neutralitad)».

Neutralitätsinitiative — © Anthony Anex, Keystone

L’iniziativa en furma concisa

La neutralitad da la Svizra è francada dapi l’onn 1848 en la Constituziun federala. Ella è renconuschida sin tut il mund e vegn garantida dal dretg internaziunal. La Svizra utilisescha ella per proteger sia segirezza, sia independenza e ses bainstar. Grazia a la neutralitad po la Svizra furnir ses buns servetschs. En concordanza cun sia neutralitad collavura la Svizra cun auters stadis per rinforzar sia segirezza. Ella po er surpigliar sancziuns. Uschia sustegna ella l’urden internaziunal. Per exempel ha la Svizra surpiglià la gronda part da las sancziuns da la UE suenter l’attatga da la Russia sin l’Ucraina, in’attatga che ha violà il dretg internaziunal.

L’iniziativa pretenda ina pratica da neutralitad pli stricta e vul prescriver supplementarmain en la Constituziun, che la neutralitad da la Svizra è eterna ed armada. La Svizra na duai sa participar a naginas allianzas militaras u defensivas ed er betg collavurar cun ina tala allianza, nun ch’i dettia in’attatga militara sin la Svizra u preparaziuns per ina tala attatga. Plinavant na duai ella betg sa participar a dispitas militaras tranter terzs stadis e betg prender sancziuns cunter stadis en guerra. Exceptadas fissan sancziuns da las Naziuns Unidas (ONU) sco er mesiras per impedir che sancziuns vegnan guntgidas. La finala duai la Svizra duvrar sia neutralitad per sia rolla sco intermediatura.

Dumonda da votaziun

Vulais Vus acceptar l’iniziativa dal pievel «Mantegnair la neutralitad svizra (Iniziativa da neutralitad)»?

Recumandaziun dal Cussegl federal e dal parlament

Tenor il Cussegl federal ed il parlament è la pratica da neutralitad sa cumprovada dapi l’onn 1848. La Constituziun federala conceda oz la libertad d’agir necessaria. Uschia po il Cussegl federal defender ils interess da la Svizra en il rom dal dretg da neutralitad, er sche las circumstanzas sa midan. L’iniziativa restrenschess questa libertad d’agir.

Recumandaziun dal comité d’iniziativa

Per il comité ha la neutralitad protegì la Svizra da la miseria da guerra e pussibilità pasch, segirezza e bainstar en Svizra. Cun l’Iniziativa da neutralitad vegnia garantì, che la Svizra mantegnia sia neutralitad unica da maniera duraivla, armada e cumpletta e na la tractia betg differentamain sin squitsch da l’exteriur.