Iniziativa d’alimentaziun

Il 27 da settember 2026, vegn la populazion a votar davart l'iniziativa dal pievel «Per in’alimentaziun segira – grazia al rinforzament d’ina producziun indigena duraivla, a dapli victualias vegetalas ed ad aua da baiver netta (Iniziativa d’alimentaziun)».

Ernährungsinitiative — © Martin Ruetschi, Keystone

L’iniziativa en furma concisa

La populaziun svizra duai avair da tut temp access ad ina quantitad suffizienta da victualias d’auta qualitad e pajablas. La Confederaziun sto stgaffir las cundiziuns generalas adattadas per quest intent. Questa incumbensa è francada en la Constituziun federala. Actualmain cuvra l’agricultura svizra in zic damain che la mesadad dal basegn da victualias, il rest vegn importà da l’exteriur. Per proteger l’ambient, la biodiversitad e l’aua da baiver sto l’agricultura svizra ademplir ina seria da prescripziuns.

L’Iniziativa d’alimentaziun vul che la Svizra produceschia bler dapli victualias sezza. Uschia duai la Svizra daventar pli independenta da l’exteriur. En l’avegnir duain almain 70 pertschient da las victualias che vegnan consumadas en Svizra, er vegnir producidas en Svizra. Per cuntanscher quai, duai l’agricultura svizra producir damain victualias d’animals e dapli victualias vegetalas. En questa moda èsi pussaivel da nutrir dapli glieud cun la medema surfatscha. Plinavant vul l’iniziativa proteger meglier l’ambient e l’aua da baiver sco er mantegnair la fritgaivladad dal terren e la biodiversitad. Las puras ed ils purs duain utilisar pli paucs products fitosanitars e pli pauc ladim. Las finamiras duain vegnir cuntanschidas entaifer 10 onns, suenter che l’iniziativa è vegnida acceptada.

Dumonda da votaziun

Vulais Vus acceptar l’iniziativa dal pievel «Per in’alimentaziun segira – grazia al rinforzament d’ina producziun indigena duraivla, a dapli victualias vegetalas ed ad aua da baiver netta (Iniziativa d’alimentaziun)»?

Recumandaziun dal Cussegl federal e dal parlament

Per il Cussegl federal e per il parlament va l’iniziativa memia lunsch. I n’è strusch pussaivel da cuntanscher las finamiras entaifer 10 onns. Perquai stuess il stadi intervegnir massivamain en la producziun ed en las disas da mangiar. Quai chaschunass gronds custs e restrenschess la libra tscherna per las consumentas ed ils consuments.

Recumandaziun dal comité d’iniziativa

Tenor il comité n’è l’agricultura svizra actualmain betg concepida per nutrir sezza la populaziun en cas d’ina crisa. Plinavant na saja l’aua da baiver betg protegida suffizientamain. Perquai vul l’iniziativa rinforzar il provediment cun victualias indigenas, oravant tut vegetalas, sco er cun aua da baiver netta.