Imposiziun da taglia da pèrs maridads

Il 29 da november 2026, vegn la popolaziun a votar davart l'iniziativa dal pievel «Gea a taglias federalas gistas er per ils pèrs maridads – Per finalmain metter ina fin a la discriminaziun da la lètg!».

Il project en furma concisa

Pèrs maridads e betg maridads èn suttamess oz differentamain a la taglia. Cun l’imposiziun da taglia individuala ch’il pievel ha acceptà ils 8 da mars 2026, scroda quest tractament different. A partir da l’onn 2032 vegnan tut ils pajataglias suttamess sin plaun federal e chantunal individualmain a la taglia. Quai vul dir: mintga persuna suttametta a la taglia sias atgnas entradas e sia atgna facultad.

Cuntrari a l’imposiziun da taglia individuala prevesa l’iniziativa, che las entradas dals pèrs maridads vegnan vinavant quintadas ensemen per la taglia federala directa. Plinavant na duain pèrs maridads betg vegnir dischavantagiads envers auters pajataglias. Omadus fatgs duain da nov vegnir fixads en la Constituziun. Il parlament ha 3 onns temp per realisar l’iniziativa cun ina lescha. Sch’ina tala lescha n’entra betg en vigur fin l’onn 2030, sto il Cussegl federal introducir l’uschenumnada calculaziun da taglia alternativa: en quest cas vegn la taglia federala directa d’in pèr maridà calculada tant tenor l’imposiziun da taglia cuminaivla sco er tenor l’imposiziun da taglia da persunas betg maridadas. Il pèr maridà paja lura la summa pli bassa. Las consequenzas finanzialas da l’iniziativa dependan da la realisaziun tras il Cussegl federal ed il parlament. Sin basa da las tariffas da taglia dad oz dastgassan cunzunt pèrs maridads vegnir distgargiads, tut tenor la realisaziun, per tut en tut circa 680 milliuns fin 3 milliardas francs per onn tar la taglia federala directa. Sin plaun chantunal valess a partir da l’onn 2032 percunter l’imposiziun da taglia individuala, sche quai na vegn betg adattà fin lura en las leschas.

Dumonda da votaziun

Vulais Vus acceptar l’iniziativa dal pievel «Gea a taglias federalas gistas er per ils pèrs maridads – Per finalmain metter ina fin a la discriminaziun da la lètg!»?

Recumandaziun dal Cussegl federal e dal parlament

Il Cussegl federal ed il parlament recumondan da refusar l’iniziativa. La puniziun da la maridaglia vegn gia abolida cun l’imposiziun da taglia individuala. L’iniziativa privilegescha pèrs maridads envers persunas betg maridadas e stgaffescha novas malsegirezzas, perquai ch’ella po chaschunar sistems fiscals cuntradictorics tar la Confederaziun ed ils chantuns.

Recumandaziun dal comité d’iniziativa

Per il comité represchenta l’iniziativa modernitad, gistadad e simpladad. Ella portia ina schliaziun pragmatica e francheschia in cler princip en la Constituziun: pèrs maridads vegnan suttamess communablamain a la taglia federala directa e na dastgan betg vegnir dischavantagiads envers auters pajataglias.