Finanziaziun supplementara da la AVS

Il 29 da november 2026, vegn la popolaziun a votar davart il conclus federal davart la finanziaziun supplementara da la AVS tras in augment da la taglia sin la plivalur.

Il project en furma concisa

Il mars 2024 ha il pievel svizzer acceptà l’Iniziativa per ina 13avla renta da la AVS. La 13avla renta vegn pajada per l’emprima giada il december 2026 a las var 2,6 milliuns persunas pensiunadas. Quai custa al cumenzament passa 4 milliardas e pli tard passa 5 milliardas francs. La Confederaziun sto surpigliar bundant in tschintgavel da quests custs. Il rest n’è actualmain betg finanzià. Cun la 13avla renta ha la AVS gia l’onn 2026 dapli expensas che entradas. Senza entradas supplementaras s’engrondescha il deficit dad onn ad onn e la AVS perda pli e pli fitg l’equiliber finanzial.

Perquai ha il parlament concludì da finanziar ina part da la 13avla renta da la AVS cun auzar la taglia sin la plivalur (TPV) per 0,4 puncts procentuals. Betg pertutgada da l’augment da la taglia sin la plivalur è tscherta rauba dal mintgadi, sco victualias u medicaments. L’augment porta entradas supplementaras d’approximativamain 1,4 milliardas francs per onn a la AVS. Ensemen cun la contribuziun federala cuvra el circa la mesadad dals custs supplementars per la 13avla renta da la AVS. Uschia sa reduceschan ils deficits annuals che resultan pervia da las expensas supplementaras per la 13avla renta da la AVS, e las reservas da la AVS (Fond da cumpensaziun) diminueschan main svelt. Per pudair augmentar la taglia sin la plivalur dovri ina votaziun. L’augment po entrar en vigur il pli baud il cumenzament da l’onn 2028. Per ils onns 2026 e 2027 na datti pia nagina finanziaziun supplementara per ils pajaments da la 13avla renta da la AVS.

Dumonda da votaziun

Vulais Vus acceptar il conclus federal dals 19 da zercladur 2026 davart la finanziaziun supplementara da la AVS tras in augment da la taglia sin la plivalur?

Recumandaziun dal Cussegl federal e dal parlament

Il Cussegl federal ed il parlament vulan ina AVS cun finanzas stabilas. L’augment da la taglia sin la plivalur per la 13avla renta da la AVS è in pass impurtant en quest connex. Sur la taglia sin la plivalur vegnan ils custs per extender la AVS repartids sin tut las generaziuns. Tscherta rauba dal mintgadi, sco victualias, è exceptada da l’augment.

Punct da vista da la minoritad dal parlament

Ina minoritad dal parlament refusa il project. Ella vuless finanziar la 13avla renta da la AVS en il rom da la proxima refurma. En quest connex na duain las finanzas da la AVS betg vegnir stabilisadas mo tras entradas supplementaras, mabain er tras mesiras structuralas, sco per exempel in augment da la vegliadetgna da renta.