Elecziun dal Cussegl federal
Il Cussegl federal vegn elegì da l'Assamblea federala plenara en Svizra. L'elecziun ha lieu mintga 4 onns il december, e quai durant la sessiun suenter l'elecziun per la renovaziun totala dal Cussegl naziunal.
Premissas per l'elecziun en il Cussegl federal
- En il Cussegl federal po vegnir elegì mintga Svizzer cun dretg da votar. Ina candidatura precedenta è gist uschè pauc indispensabla sco ina commembranza en il parlament.
- Tar l'elecziun sto l'Assamblea federala dar attenziun che las regiuns e las cuminanzas linguisticas èn represchentadas adequatamain. Reglas exactas na datti betg per quest intent.
- Ils commembers dal Cussegl federal na dastgan betg surpigliar in'autra funcziun en il servetsch da la Confederaziun u dals chantuns: Els ston pia sa decider suenter l'elecziun.
Andament da l'elecziun dal Cussegl federal
- En ils emprims 2 scrutinis po mintga persuna che po vegnir elegida (vesair qua survart) survegnir vuschs.
- Davent dal terz scrutini n'èn admessas pli naginas ulteriuras candidaturas. I pon mo pli vegnir elegidas persunas che han survegnì vuschs en ils emprems 2 scrutinis. Sche nagin cuntanscha la maioritad absoluta (q.v.d. dapli che la mesadad da las vuschs valaivlas), vegn exclusa dal proxim scrutini la persuna cun las pli paucas vuschs.
- Quai vegn repetì uschè ditg, fin che ina persuna ha cuntanschì la maioritad absoluta ed è uschia elegida.
- Las commembras ed ils commembers dal Cussegl federal vegnan elegids da l'Assamblea federala plenara per ina perioda d'uffizi da 4 onns.
- Las commembras ed ils commembers dal Cussegl federal en uffizi vegnan reelegids en la successiun da lur vegliadetgna d'uffizi.
- Alura vegnan elegids la presidenta u il president da la Confederaziun sco er la vicepresidenta u il vicepresident per il proxim onn.
Elecziun dal president da la Confederaziun
Mintga onn il december elegia il parlament 1 dals 7 commembers dal Cussegl federal sco president da la Confederaziun. Quel pratitgescha quest uffizi in onn.
Presidi da la Confederaziun
Dapli infurmaziuns davart l’elecziun dal Cussegl federal
Da l'elecziun fin a la demissiun
Las commembras ed ils commembers dal Cussegl federal vegnan elegids da l'Assamblea federala. La perioda d'uffizi dura 4 onns, ina reelecziun u nunreelecziun è pussaivla. Las cusseglieras ed ils cussegliers federals decidan sezs, cur els vulan demissiunar.
Elecziuns dal Cussegl federal dapi l'onn 1848
La regenza svizra consista da set cusseglieras federalas e cussegliers federals. Bundant 100 cusseglieras federalas e cussegliers federals han guvernà la Svizra fin ussa. Elegids u confermads vegnan las cusseglieras federalas ed ils cussegliers federals dal parlament per 4 (pli baud 3) onns.