Quanta paja survegn il Cussegl federal?
Salari, pensiun, vehichels da lavur e.u.v. Qua vegnis Vus a savair dapli davart ils dretgs e las obligaziuns da cusseglieras e cussegliers federals en uffizi ed en pensiun.
Salari
Las entradas annualas bruttas d'ina cussegliera u d'in cusseglier federal importan 477‘688 francs (stadi dal 1. da schaner 2025). Sco las autras pajas dal persunal federal vegn er quest salari adattà a la chareschia. I na dat dentant nagin augment real dal salari.
Tar il salari vegn vitiers ina pauschala da spesas da 30'000 francs per onn (stadi dal 1. da schaner 2025, betg indexà). La presidenta u il president da la Confederaziun survegn ultra da quai ina indemnisaziun da 12'000 francs durant l'onn presidial. Ultra da quai vegnan surpigliads ils custs da telecommunicaziun (rait fixa, telefon mobil, computer).
Vehichels da lavur
La taxa per radio e televisiun pajan las cusseglieras ed ils cussegliers federals sezs. Mintga commember dal Cussegl ed er la chanceliera federala han il dretg d'in vehichel da represchentaziun e d'in vehichel da servetsch. Per il diever privat vegn mess a quint per mais 0,9 pertschient dal pretsch da cumpra dal vehichel.
Mintga commember dal Cussegl federal survegn plinavant in abunament general da la 1. classa da las Viafiers federalas svizras.