Charas conburgaisas e chars conburgais
In onn nov è in regal. Oz, il prim da schaner, avrin nus quest regal – tuttas e tuts ensemen. Nus avain la pussaivladad da cumenzar cun insatge nov. Nus tuttas e tuts sperain che l'onn nov portia sanadad e cuntentientscha. A mintgina e mintgin da nus ed a tut la Svizra.
Deplorablamain na pudain nus betg cumenzar l'onn nov, sco quai che nus avevan sperà: la pandemia è anc adina preschenta ed ans metta a la prova. Ella fa che nus essan vulnerabels e malsegirs. Mintgatant er bandunads.
La pandemia ans ha separà, ma ella n'ans ha betg dividì. Nus n'ans laschain betg divider. Er sche las mascrinas zuppan noss surrir, pudain nus guardar en ils egls in a l'auter e tadlar in l'auter.
Charas conburgaisas e chars conburgais
N'emporta betg en tge part da noss pajais che Vus vivais e tge lingua che Vus discurris, e n'emporta betg sche Vus essas giuven u vegl, vaccinà u betg vaccinà – il Cussegl federal ha in'ureglia averta per Vus. Jau As poss garantir: il Cussegl federal chapescha Voss quitads e Vossas temas. Prendend sias decisiuns s'orientescha il Cussegl federal adina a l'interess general da la Svizra e da sia populaziun.
Nus tuttas e tuts avain differentas ragischs, mentalitads ed experientschas. Nus essan da la Bassa, da las muntognas e da la Svizra dal Sid. Nus essan da la citad e da la champagna, dal center e da la periferia. Malgrà questas differenzas ans unescha bler dapli che quai che ans separa. Nossa diversitad è ina ritgezza. E questa diversitad dat forza a la Svizra.
Questa diversitad è dentant er ina sfida permanenta per mintgina e mintgin da nus. Nossas differentas linguas, culturas, religiuns e noss differents moviments politics procuran per in dialog ch'è mintgatant dischagreabel.
- Diversitad pretenda engaschament.
- Diversitad vul dir da sa metter en la situaziun d'insatgi auter.
- Diversitad vul er dir da desister d'insatge, da far cumpromiss. Er quai dat forza a la Svizra.
Per l'onn nov giavisch jau che nus vivian puspè pli fitg questa diversitad, che nus ans avischinian in a l'auter e che nus respectian autras opiniuns – er sche nus avain ideas differentas.
Gist en in temp che la polarisaziun smanatscha, stuain nus daventar conscients da quai che ans collia, da quai ch'è caracteristic per la coesiun naziunala. Ensemen essan nus la Svizra!
Charas conburgaisas e chars conburgais
Coesiun e passiun per la diversitad. Uschia pudain nus dumagnar las sfidas da l'onn nov e giudair cuminaivlamain ils muments legraivels.
Jau guard cun confidenza vers il futur: l'uman ha adina dumagnà il cumbat perpeten cunter virus e cunter pandemias, e quai vegn ad esser uschia er questa giada. Nus duvrain pazienza, ensemen vegnin nus però a gudagnar quest cumbat.
Per l'onn 2022 [duamilli e ventgadus] As giavisch jau buna sanadad, energia e cuntentientscha.
Bun di, bun onn!
(Es guets Nöis – Bonne année – Buon anno!)
Ultima midada 30.12.2021
