Cuntraproposta tar l'iniziativa per il velo
L’onn 2015 han differentas partidas ed associaziuns lantschà la «Iniziativa per il velo» cun la finamira d’obligar la Confederaziun da promover las vias da velo. Tenor l’avis dal Cussegl federal e dal parlament gievan las pretensiuns da questa iniziativa memia lunsch. Per quest motiv han els elavurà ina cuntraproposta ch’incumbensescha la Confederaziun da sustegnair e da coordinar las mesiras a favur da vias da velo, sco quai ch’ella fa gia per las vias e sendas da viandar. Sin fundament da questa cuntraproposta è vegnida retratga l’Iniziativa per il velo. Ils 23 da settember votain nus pia davart la cuntraproposta dal Cussegl federal e dal parlament.
Iniziativa da fair-food
La finamira da l’iniziativa è quella d’augmentar la purschida da victualias che vegnan producidas en moda ecologica che respecta ils animals ed en moda faira. La Confederaziun duai fixar prescripziuns respectivas per la producziun indigena. Controllas specificas duain plinavant garantir che er las victualias importadas adempleschian quests standards. L’iniziativa ha medemamain en mira da reducir ils effects dal transport da victualias per l’ambient, da cumbatter il sguaz da victualias e da promover la producziun regiunala e stagiunala.
Iniziativa per la suveranitad alimentara
L’iniziativa dal pievel «Per la suveranitad alimentara» è vegnida inoltrada d’in comité d’iniziativa che vegn purtà dal sindicat puril Uniterre. La finamira è quella da midar la politica agrara da la Confederaziun che va tenor l’avis da las iniziantas e dals iniziants en la faussa direcziun. Cun l’iniziativa duai vegnir promovida in’agricultura locala, diversa, durabla e libra da tecnica genetica. Il stadi duai procurar per bunas cundiziuns da lavur e per pajas commensuradas per las persunas che lavuran en quest sectur. Plinavant duai el proteger l’agricultura indigena cun incassar dazis sin tscherts products ubain cun scumandar l’import da products. Talas mesiras cuntrafan dentant las cunvegnas internaziunalas vertentas.
Explicaziuns dal Cussegl federal
Votar: cura, nua, co?
.png)
Infurmaziuns utilas per las votantas ed ils votants
Cura è avert mes biro da votaziun? Fin cura stoss jau trametter mes cedel da votar? Tge stoss jau resguardar cun emplenir il cedel da votar?
Ultima midada 14.06.2019
