Conclus federal davart la finanziaziun supplementara da la AVS tras in augment da la taglia sin la plivalur / Lescha federala davart la refurma da la prevenziun da vegliadetgna 2020
Ils 24 da settember 2017 ha la populaziun votà davart ils Conclus federal davart la finanziaziun supplementara da la AVS tras in augment da la taglia sin la plivalur e la Lescha federala davart la refurma da la prevenziun da vegliadetgna 2020.
Resultats
Davart quai vegni votà
Ils dus projects duain segirar las rentas da la AVS e da la prevenziun professiunala obligatorica cun agid da mesiras da distgargia e d’entradas supplementaras. La refurma unifitgescha la vegliadetgna da renta dals umens e da las dunnas tar 65 onns. A medem temp pussibilitescha ella il pensiunament flexibel tranter 62 e 70 onns e meglierescha la prevenziun da vegliadetgna da persunas che lavuran a temp parzial e che han entradas bassas.
Las dumondas da votaziun:
1. Vulais Vus acceptar il conclus federal dals 17 da mars 2017 davart la finanziaziun supplementara da la AVS tras in augment da la taglia sin la plivalur?
2. Vulais Vus acceptar la Lescha federala dals 17 da mars 2017 davart la refurma da la prevenziun da vegliadetgna 2020?
Recumandaziun a las votantas ed als votants
1. Il Cussegl federal ed il parlament recumondan d’acceptar la midada da la Constituziun federala.
Il Cussegl naziunal ha acceptà il project cun 101 cunter 92 vuschs e 4 abstenziuns, il Cussegl dals chantuns cun 27 cunter 18 vuschs e 0 abstenziuns.
2. Il Cussegl federal ed il parlament recumondan d’acceptar la Lescha federala davart la refurma da la prevenziun da
vegliadetgna 2020.
Il Cussegl naziunal ha acceptà il project cun 100 cunter 93 vuschs e 4 abstenziuns, il Cussegl dals chantuns cun 27 cunter 18 vuschs e 0 abstenziuns.
