Il Departament federal da defensiun, protecziun da la populaziun e sport (DDPS)

Il Departament federal da defensiun, protecziun da la populaziun e sport (DDPS) è responsabel per la segirezza da la Svizra e da sia populaziun. Manà vegn el dapi il cumenzament da l'onn 2019 da la cussegliera federala Viola Amherd.

Scheffa dal DDPS Viola Amherd

Cussegliera federala Viola Amherd

Viola Amherd è naschida l’onn 1962 ed è creschida si a Brig-Glis. Ella ha frequentà il collegi a Brig ed ha studegià scienzas dal dretg a l’Universitad da Friburg. L’onn 1991 ha ella obtegnì la patenta d’advocata dal chantun Vallais. Dapi lura ha ella lavurà sco advocata e notara independenta a Brig-Glis. Viola Amherd è nubila.

Viola Amherd ha cumenzà sia carriera politica l’onn 1992 en l’executiva da Brig-Glis. Da l’onn 2000 fin l’onn 2012 è ella stada presidenta da la citad da Brig. L’onn 2005 è ella vegnida elegida en il Cussegl naziunal. Da l’onn 2011 fin a sia elecziun en il Cussegl federal è ella stada vicepresidenta da la fracziun da la PCD en il parlament.

Viola Amherd ha plinavant occupà differents mandats administrativs ed è stada activa en associaziuns ed uniuns.

Elecziun en il Cussegl federal

Ils 5 da december 2018 ha l’Assamblea federala plenara elegì Viola Amherd en il Cussegl federal. Ella maina dapi il schaner 2019 il DDPS.

Il Departament federal da defensiun, protecziun da la populaziun e sport (DDPS)

Sch'ins discurra dal DDPS, pensan blers l'emprim a l'armada. Ma er en il sectur civil ha il departament incumbensas impurtantas per la segirezza da la Svizra e da sia populaziun. Dal DDPS fan part er ils secturs protecziun da la populaziun, il Servetsch d'infurmaziun da la Confederaziun, l'Uffizi federal da topografia swisstopo sco er armasuisse, il Center da cumpetenzas da la Confederaziun per l'acquisiziun da tecnologia cumplexa. Ultra da quai cumpiglia la gronda diversitad tematica dal DDPS er la promoziun dal sport da massa e da prestaziun.

Cifras pertutgant il DDPS

Plazzas a temp cumplain (2022): 12'128

Tenor il preventiv quinta il DDPS per l'onn 2022 cun custs da 8,24 milliardas francs.

 
 
 
 

La presidenta da la Confederaziun Viola Amherd

L’onn 2024 n’è Viola Amherd betg mo la scheffa dal DDPS, mabain era la presidenta da la Confederaziun. Quest uffizi cumpiglia oravant tut duairs da represchentaziun. Ultra da quai è Amherd en il Cussegl federal “primus inter pares”, quai vul dir l’emprim tranter collegas cun las medemas intenziuns. 

Presidi da la Confederaziun

 

Ultima midada 29.12.2023

Tar il cumenzament da la pagina

https://www.admin.ch/content/gov/rm/start/departemente/departement-fuer-verteidigung-bevoelkerungsschutz-sport-vbs.html