Il Departament federal per ambient, traffic, energia e communicaziun (DATEC)

Il Departament federal per ambient, traffic, energia e communicaziun (DATEC) è il departament da l'infrastructura e da l'ambient. Manà vegn el dapi il schaner 2019 da Simonetta Sommaruga.

Simonetta Sommaruga
Scheffa dal DATEC Simonetta Sommaruga. (Fotografia: Matthias Luggen)

Cussegliera federala Simonetta Sommaruga

Simonetta Sommaruga è naschida ils 14 da matg 1960 ed è creschida si a Sins en il Freiamt (AG). Suenter la matura è ella sa laschada scolar sco pianista al conservatori da Lucerna. Suenter segiurns a l'exteriur ha ella cuntinuà cun sia activitad concertanta e cun sia lavur pedagogica al conservatori da Friburg. Simonetta Sommaruga è maridada.

A partir da l'onn 1993 è dunna Sommaruga stada la gestiunaria da la Fundaziun per la protecziun dals consuments e da l'onn 2000 fin l'onn 2010 sia presidenta.

Dal 1997 fin il 2005 è ella stada cussegliera communala a Köniz (scheffa dals pumpiers e da la protecziun civila) e dal 1999 fin il 2003 cussegliera naziunala da la PS.

Dal 2003 fin il 2010 ha ella represchentà il chantun Berna en il Cussegl dals chantuns.

Elecziun en il Cussegl federal

Ils 22 da settember 2010 ha l'Assamblea federala plenara elegì dunna Sommaruga en il Cussegl federal. Dal november 2010 fin il december 2018 ha ella dirigì il Departament federal da giustia e polizia. Dapi il 2019 è ella scheffa dal DATEC.

Il Departament federal per ambient, traffic, energia e communicaziun (DATEC)

Il DATEC s'occupa tant da l'infrastructura sco er da l'ambient. Pertutgant l'infrastructura sa tracti da las vias da traffic, da las raits da communicaziun e da las raits electricas. Il DATEC sto dentant er observar ils interess da l'ambient, da la sanadad e da la segirezza. Questa concentraziun d'interess utilitars e d'interess da protecziun en il medem departament maina savens a conflicts. Las decisiuns ston perquai vegnir preparadas fitg conscienziusamain.

Cifras pertutgant il DATEC

Plazzas a temp cumplain (2017): 2240

Tenor il preventiv quinta il DATEC per l'onn 2017 cun custs da 10,69 milliardas francs.

 
 
 

Ultima midada 22.05.2019

Tar il cumenzament da la pagina

https://www.admin.ch/content/gov/rm/start/departemente/departement-fuer-umwelt-verkehr-energie-kommunikation-uvek.html