Il Departament federal d'affars exteriurs (DFAE)

Il Departament federal d'affars exteriurs (DFAE) represchenta la Svizra vers anora. Manà vegn el dapi 2017 da Ignazio Cassis.

Schef dal DFAE Ignazio Cassis. (Keystone, Gaëtan Bally)

Cusseglier federal Ignazio Cassis

Ignazio Cassis è naschì ils 13 d’avrigl 1961. 1987 ha el terminà ses studi da medischina umana a l’Universitad da Turitg. 1996 ha el obtegnì il diplom en sanadad publica a l’Universitad da Genevra. 1998 ha el finì sia furmaziun supplementara da spezialist da medischina interna sco er da prevenziun e da sanadad. Da 1988 fin 1996 ha el exercità la professiun da medi. Da 1996 fin 2008 è el stà medi chantunal dal chantun Tessin. Tranter 2008 e 2012 ha el occupà l’uffizi da vicepresident da la Federaziun dals medis svizzers (FMH). Ignazio Cassis ha instruì a differentas universitads da la Svizra. El è stà a la testa da l’Associaziun dals instituts socials e da tgira svizzers CURAVIVA e da l’Associaziun dals assicuraders da malsauns innovativs Curafutura.

2007 è Ignazio Cassis vegnì elegì en il Cussegl naziunal sco represchentant da la PLD tessinaisa. Dapi 2015 è el stà president da la fracziun da la PLD.Ils Liberals da l’Assamblea federala. Dapi 2015 ha el presidià la Cumissiun per segirezza sociala e sanadad dal Cussegl naziunal.

Ignazio Cassis è maridà. 

Elecziun en il Cussegl federal

Ils 20 da settember 2017 ha l'Assamblea federala plenara elegì Didier Burkhalter en il Cussegl federal. Dapi il 1-11-2017 dirigia el il Departament federal d'affars exteriurs. L’onn 2022 Ignazio Cassis è stà president da la Confederaziun.

Il Departament federal d'affars exteriurs (DFAE)

Il DFAE defenda ils interess da la Svizra a l'exteriur e realisescha la strategia da la politica exteriura dal Cussegl federal. Ina paisa speziala dat il Cussegl federal a la tgira ed a l'extensiun da las relaziuns cun ils stadis vischins e cun la UE. Cun tecnologias modernas vul il DFAE ultra da quai tegnair à jour e meglierar ses servetschs per las Svizras ed ils Svizzers a l'exteriur.

Cifras pertutgant il DFAE

Plazzas a temp cumplain (2022): 5469

Tenor il preventiv quinta il DFAE per l'onn 2022 cun custs da 3,29 milliardas francs.

 
 

Ultima midada 29.12.2023

Tar il cumenzament da la pagina

https://www.admin.ch/content/gov/rm/start/departemente/departement-fuer-auswaertige-angelegenheiten-eda.html