Ambient elegant per ils giasts dal stadi e per occurrenzas festivas
Residenza da champagna Lohn
Il Lohn è vegnì construì ils onns 1782/83 ed è situà en la vischnanca da Kehrsatz al sidost da Berna. L'ultima possessura privata è stada Helene Welti-Kammerer, la brit da l'anteriur cusseglier federal Emil Welti. Ella ha fatg si l'edifizi l'onn 1942 a la Confederaziun, cun il giavisch ch'ils cussegliers federals possian far vacanzas sin quest bain cun ina vista magnifica sur la vasta val da l'Aara.
Il Cussegl federal na dovra dentant betg la villa sco chasa da vacanzas, mabain oravant tut sco chasa da giasts. Numerus schefs e scheffas da stadis, tranter auter la regina da l'Engalterra Elizabeth II., èn vegnids beneventads là. Dapi l'onn 1994 na pernotteschan pli nagins giasts al Lohn, mabain en l'hotel Bellevue Palace che appartegna medemamain a la Confederaziun.
Chasa Beatrice von Wattenwyl
La Chasa Beatrice von Wattenwyl en la citad veglia da Berna datescha da l'onn 1446. L'onn 1934 ha Emanuel von Wattenwyl fatg si la chasa patriziana a la Confederaziun svizra. Quai en num da sia consorta Beatrice ch'era morta l'onn 1929.
Il Cussegl federal dovra la chasa per beneventar giasts, ma er per suttascriver contracts e per manar discurs politics. Enconuschents èn ils "discurs von Wattenwyl" dal Cussegl federal cun las direcziuns da las partidas avant mintga sessiun da las Chombras federalas.
Hotel Bellevue Palace
A l'ost ed al vest è la Chasa federala stada flancada ditg da hotels nobels, il Bernerhof ed il Bellevue Palace. Suenter la fundaziun dal stadi federal han hoteliers capabels sentì che Berna dovra localitads per ils parlamentaris e per ils giasts dal stadi. Suenter il declin en consequenza da l'Emprima guerra mundiala è il Bernerhof vegnì cumprà l'onn 1924 da la Confederaziun sco sedia per il Departament federal da finanzas. Il Bellevue percunter è anc oz in hotel. L'onn 1976 ha la Banca naziunala svizra surpiglià la maioritad da las aczias. L'onn 1994 ha ella regalà quella a la Confederaziun. La Confederaziun ha lura renovà e modernisà l'hotel. Sia gestiun è vegnida dada a fittanza ad ina societad privata che ha er auters hotels svizzers da grond renum en ses portfolio.
