L'incumbensa la pli impurtanta dal Cussegl federal è il guvernar. El giuditgescha cuntinuadamain la situaziun politica, fixescha las finamiras ed il meds finanzials da l'agir statal, maina la realisaziun da las incumbensas e represchenta la Confederaziun vers anen e vers anora.
Las cumpetenzas dal Cussegl federal èn descrittas en ils artitgels 180 fin 187 da la Constituziun federala. L'emprima plazza occupa il chavazzin "politica guvernamentala". En questa noziun sa zuppa il "guvernar" sco tal. La Constituziun federala definescha er, tge che quai è:
- il Cussegl federal determinescha las finamiras da sia politica e planisescha l'impundaziun da las resursas ch'èn necessarias per cuntanscher questas finamiras;
- el infurmescha la publicitad a temp e detagliadamain davart sias activitads.
Ulteriuras incumbensas dal Cussegl federal
Legislaziun ed execuziun dal dretg
Il Cussegl federal suttametta al parlament propostas per realisar iniziativas dal pievel e leschas. En atgna cumpetenza relascha el ordinaziuns cun las disposiziuns executivas tar leschas. El exequescha conclus da l'Assamblea federala che na suttastattan betg al referendum, p.ex. incumbensas per planisaziuns.
Responsabladad per las finanzas federalas
Il Cussegl federal porta la responsabladad per las finanzas federalas. Quai vul dir ch'el suttametta al parlament in plan da finanzas da plirs onns e mintga onn in preventiv. Cun il quint dal stadi dat el rendaquint al parlament davart l'impundaziun dals meds finanzials.
Responsabladad per la segirezza da la Svizra
Il Cussegl federal è responsabel per las relaziuns da la Svizra cun l'exteriur e per la segirezza interna ed externa dal pajais. En quests dus secturs po il Cussegl federal decretar ordinaziuns e disposiziuns, sche quai è necessari per motivs da la segirezza. Eventualmain po el clamar l'armada per mantegnair la segirezza.
Tgirar las relaziuns cun ils chantuns
Tenor la Constituziun federala èn ils chantuns suverans. Tar las incumbensas dal Cussegl federal tutgi pia da tgirar las relaziuns e la collavuraziun cun ils chantuns.
Manar l'administraziun federala
La finala maina il Cussegl federal l'administraziun federala cun var 38 000 collavuraturas e collavuraturs. L'administraziun federala è dividida en departaments; mintga commembra e mintga commember dal Cussegl federal maina in departament.
