L'uffizi dal president da la Confederaziun

Cuntrari ad auters pajais na daventa mai ina persuna singula schef da stadi en Svizra. Durant ses onn d'uffizi ha la persuna en quest uffizi, sco «prima inter pares», dentant ina retscha da funcziuns e d'incumbensas tradiziunalas.

Lavurs preparatoricas per ina visita statala uffiziala l'onn 1996 a Berna (KEYSTONE/Str)

La presidenta u il president da la Confederaziun vegn elegì da l'Assamblea federala plenara mintgamai per in onn d'uffizi. Er sche la denominaziun da l'uffizi sugerescha: Il president da la Confederaziun n'è betg schef da stadi – questa funcziun na surpiglia en Svizra betg ina persuna singula, mabain l'entir Cussegl federal, che retschaiva per exempel en cas da visitas uffizialas il schef da stadi da l'exteriur. Il president da la Confederaziun vegn designà sco "primus inter pares". El maina las sesidas dal Cussegl federal e pacifitgescha en dumondas dispitaivlas. En cas urgents ordinescha il president da la Confederaziun mesiras preventivas. E per il cas improbabel che ni ina tractativa ordinaria ni ina tractativa extraordinaria dal Cussegl federal è pussaivla, decida il president da la Confederaziun sulet.

Uffizi dal vicepresident

Ultra dal president da la Confederaziun elegia l'Assamblea federala plenara mintgamai er la vicepresidenta u il vicepresident dal Cussegl federal. Il vicepresident vegn dentant activ, sche la presidenta da la Confederaziun è impedida d'ademplir ses uffizi e surpiglia alura er las obligaziuns presidialas. Ultra da quai po il Cussegl federal surdar al vicepresident cumpetenzas presidialas.

Obligaziuns da represchentaziun

Durant ses onn d'uffizi surpiglia il president da la Confederaziun obligaziuns da represchentaziun spezialas. Per exempel salva el, sco ch'igl è tradiziun, ils discurs al radio ed a la televisiun per Bumaun e per il di da la festa naziunala, il 1. d'avust. Ultra da quai beneventa el mintgamai il corps diplomatic – quai èn las diplomatas ed ils diplomats esters en Svizra – per il bainvegni da Bumaun en la Chasa federala. Dapi ils onns 1990 èsi daventà regla che il president da la Confederaziun fa viadis uffizials a l'exteriur. Er las relaziuns cun ils chantuns tgira il president da la Confederaziun en moda speziala.

Visitas uffizialas e visitas presidenzialas – las noziuns vegnan scleridas

Ina presidenta da la Confederaziun na va mai en visita uffiziala, po dentant vegnir envidada ad ina visita uffiziala. Co è quai pussaivel?

Adina puspè datti confusiun davart la dumonda da las “visitas uffizialas” a l’ester. Tant sclerin nus gia uss: In president da la Confederaziun n’è betg in schef da stadi co ch’el exista en auters pajais; questa rolla ha en Svizra l’entir Cussegl federal che na viagia dentant bunamain mai “in corpore” a l’ester (las paucas excepziuns èn l’inauguraziun dal tunnel dal Simplon a Domodossola dal 1906 e curtas excursiuns per il viadi dal Cussegl federal).

Perquai ch’ina presidenta da la Confederaziun n’è betg ina scheffa da stadi, n’è la formulaziun sco p.ex. “ella fa ina visita uffiziala” ord vista da la Svizra betg correcta. En quests cas stuess ins discurrer d’ina “visita presidenziala”.

Dumonda da la perspectiva

Ord vista dal pajais ospitant è quai in’autra chaussa. Malgrà che la Svizra n’ha numnadamain betg in schef da stadi, ston esser pussibels ils inscunters dal president u da la presidenta da la Confederaziun cun represchentants d’in auter pajais.

Ils auters stadis pon percunter envidar ils presidents da la Confederaziun ad “ina visita uffiziala” u als “retschaiver per ina visita uffiziala”; questas formulaziuns èn damai correctas. Definir definescha mintgamai il stadi ospitant, sch’el envida ad ina visita da lavur u ad ina visita uffiziala cun tut las onurs protocollaricas ch’in tal prescriva.

Tut è ina dumonda da la perspectiva. Las presidentas u ils presidents da la Confederaziun fan “be” visitas presidenzialas, vegnan dentant beneventadas e beneventads dals stadis esters “ad ina visita uffiziala”. Nagins problems chaschuna la terminologia tar visitas uffizialas en Svizra, nua ch’il giast vegn beneventà dal Cussegl federal cumplet.

Ultima midada 07.01.2019

Tar il cumenzament da la pagina

https://www.admin.ch/content/gov/rm/pagina-iniziala/presidi-confederaziun/uffizi-presidenta-confederaziun.html