Onn presidial 2022

President da la Confederaziun 2022 è il Tessinais Ignazio Cassis. El è vegnì elegì en quest uffizi ils 8 da december 2021.

Il president da la Confederaziun Ignazio Cassis ed Alain Berset, vicepresident dal Cussegl federal, en la sala dal Cussegl naziunal (Foto: Peter Klaunzer, Keystone)

Il Departament federal d’affars exteriurs (DFAE) ha l’onn 2022 la funcziun da departament presidial – ina rolla ch’el ha gì l’ultima giada l’onn 2014, cura che Didier Burkhalter è stà president da la Confederaziun.

Vicepresident dal Cussegl federal per l’onn 2022 è Alain Berset. El maina il Departament federal da l’intern (DFI).

*** 

« Gist en quest temp da crisa stuain nus pensar a tut quai ch’ans unescha: la diversitad da las culturas e da las ideas è il motor ch’ans permetta da star si e da chattar cuminaivlamain novas soluziuns.»

(Or dal pled dal cusseglier federal Ignazio Cassis ils 8 da december 2021 davant l'Assamblea federala plenara)

Ils pleds dal president da la Confederaziun vegnan publitgads sin la pagina d’internet da ses departament, il Departament federal d’affars exteriurs (DFAE).

2019

Onn presidial 2019: president da la Confederaziun Ueli Maurer

2018

Onn presidial 2018: president da la Confederaziun Alain Berset

2017

Onn presidial 2017: presidenta de la Confederaziun Doris Leuthard

2016

Onn presidial 2016: president da la Confederaziun Johann N. Schneider-Ammann 

 
 

Servetsch presidial

Dapi il cumenzament da l'onn 2015 stat a disposiziun al departament presidial in servetsch presidial ch'è affilià a la Chanzlia federala. Quest servetsch presidial è vegnì installà sin basa d'in conclus dal parlament dals 28 da settember 2012. La basa legala furma la Lescha davart l'organisaziun da la regenza e da l'administraziun (LORA).

Quest servetsch che sustegna il departament presidial tar las incumbensas che vegnan chaschunadas supplementarmain durant l'onn presidial concentrescha en spezial las prestaziuns che la Chanzlia federala (ChF) furnescha dapi in temp pli lung e talas dal Departament federal d'affars exteriurs (DFAE). L'incumbensa centrala dal servetsch presidial è quella da cussegliar la presidenta u il president da la Confederaziun en dumondas da la politica exteriura. Ina tala cussegliaziun devi gia pli baud; ella vegniva fatga dal sectur "Fatschentas presidialas" dal Secretariat da stadi. Anc pli baud vegniva delegà in diplomat en il departament presidial. Il parlament e la regenza spetgan dal servetsch presidial ch'i sa laschian concentrar là experientscha, enconuschientschas spezialas e contacts per installar uschia ina memoria instituziunala – en il senn da la cuntinuitad, ma er da l'effizienza. 

Ultima midada 30.12.2021

Tar il cumenzament da la pagina

https://www.admin.ch/content/gov/rm/pagina-iniziala/presidi-confederaziun/onn-presidial-2022.html