Onn presidial 2021

President da la Confederaziun 2021 è il Vadais Guy Parmelin. El è vegnì elegì en quest uffizi ils 9 da december 2020.

Il president da la Confederaziun Guy Parmelin ed Ignazio Cassis, vicepresident dal Cussegl federal, en la sala dal Cussegl naziunal (Foto: Peter Schneider, Keystone)

Il Departament federal d’economia, furmaziun e retschertga (DEFR) ha l’onn 2021 la funcziun da departament presidial – ina rolla ch’el ha gì l’ultima giada l’onn 2016 cun Johann Schneider-Ammann sco president da la Confederaziun.

Vicepresident dal Cussegl federal è l’onn 2021 Ignazio Cassis. El maina il Departament federal d’affars exteriurs (DFAE).

*** 

«Per in pajais cun tantas particularitads/che dispona da tantas particularitads/ritg da tantas particularitads èsi ina sfida quotidiana da garantir la coesiun. Tant pli fitg en temps difficils. Da la riva dal Lai da Genevra als guauds tessinais, da la metropola turitgaisa a mes vitg Bursins, cun tractor u cun ils meds da transport public, cun mocassins u cun chalzers da gimnastica, en quatter linguas – senza tegnair quint da tut las autras –, cun u senza passaport cun la crusch alva, milli differenzas ans reuneschan, cura che quellas ans pudessan separar/divider. Questa situaziun n’è betg d’engraziar a la casualitad: ella è il fritg d’in interess manifest per noss proxim e d’ina voluntad da dialog cun el.

La coesiun è la vaira forza da la Svizra, ensemen cun nossa mirvegliusa capacitad d’unir las differenzas en num d’ina finamira communabla: lavurar cuminaivlamain per l’avegnir e per il progress da noss pajais, per il bun da mintgina e mintgin da nus.»

(Or dal pled dal cusseglier federal Guy Parmelin ils 9 da december 2020 davant l'Assamblea federala plenara)

Ils pleds dal president da la Confederaziun vegnan publitgads sin la pagina d’internet da ses departament, il Departament federal d’economia, furmaziun e retschertga (DFER).

2020

Onn presidial 2020: Presidenta da la Confederaziun Simonetta Sommaruga

2019

Onn presidial 2019: president da la Confederaziun Ueli Maurer

2017

Onn presidial 2017: presidenta de la Confederaziun Doris Leuthard

2016

Onn presidial 2016: president da la Confederaziun Johann N. Schneider-Ammann 

 
 

Servetsch presidial

Dapi il cumenzament da l'onn 2015 stat a disposiziun al departament presidial in servetsch presidial ch'è affilià a la Chanzlia federala. Quest servetsch presidial è vegnì installà sin basa d'in conclus dal parlament dals 28 da settember 2012. La basa legala furma la Lescha davart l'organisaziun da la regenza e da l'administraziun (LORA).

Quest servetsch che sustegna il departament presidial tar las incumbensas che vegnan chaschunadas supplementarmain durant l'onn presidial concentrescha en spezial las prestaziuns che la Chanzlia federala (ChF) furnescha dapi in temp pli lung e talas dal Departament federal d'affars exteriurs (DFAE). L'incumbensa centrala dal servetsch presidial è quella da cussegliar la presidenta u il president da la Confederaziun en dumondas da la politica exteriura. Ina tala cussegliaziun devi gia pli baud; ella vegniva fatga dal sectur "Fatschentas presidialas" dal Secretariat da stadi. Anc pli baud vegniva delegà in diplomat en il departament presidial. Il parlament e la regenza spetgan dal servetsch presidial ch'i sa laschian concentrar là experientscha, enconuschientschas spezialas e contacts per installar uschia ina memoria instituziunala – en il senn da la cuntinuitad, ma er da l'effizienza. 

Ultima midada 24.03.2021

Tar il cumenzament da la pagina

https://www.admin.ch/content/gov/rm/pagina-iniziala/presidi-confederaziun/onn-presidial-2021.html