Onn presidial 2020

Presidenta da la Confederaziun 2020 è la socialdemocrata bernaisa Simonetta Sommaruga. Suenter l’onn 2015 è ella vegnida elegida en quest uffizi per la segunda giada.

Presidenta da la Confederaziun Simonetta Sommaruga e Guy Parmelin, vicepresident dal Cussegl federal, en la sala dal Cussegl naziunal ils 11 da december 2019. (Foto: Keystone, Peter Klaunzer)

Per l’emprima giada dapi l’onn presidial da Doris Leuthard l’onn 2017 ha il Departament federal per ambient, traffic, energia e communicaziun (DATEC) l’onn 2020 puspè la funcziun da departament presidial. Vicepresident dal Cussegl federal l’onn 2020 è il Vadais Guy Parmelin. El maina il Departament federal d’economia, furmaziun e retschertga (DEFR).

*** 

«Anc mai en l’istorgia da la Svizra n’è la populaziun stada represchentada en il parlament en ina moda uschè vasta. Anc mai n’hai dà en il parlament uschè bleras mammas, uschè bleras dunnas, uschè blera glieud giuvna. Quai vegn a midar la politica e cun quai er la vita da la glieud en noss pajais. (...)
Jau ma legrel sin la collavuraziun cun Vus tuts e, – per che quai saja er gist ditg – tar questa collavuraziun tutgi er che nus debatteschian intensivamain e che nus na sajan franc betg adina d’accord in cun l’auter. La populaziun spetga però da nus che nus preschentian la fin finala soluziuns ch’ella po sustegnair. La democrazia directa è ina gronda sfida per il Cussegl federal ed il parlament – e quai è bun uschia!»

(Or dal pled da la cussegliera federala Simonetta Sommaruga a chaschun da sia elecziun sco presidenta da la Confederaziun ils 11 da december 2019 davant l'Assamblea federala plenara)

Las allocuziuns da la presidenta da la Confederaziun vegnan publitgadas sin la pagina d’internet da ses departament, il Departament federal per ambient, traffic, energia e communicaziun (DATEC).

Servetsch presidial

Dapi il cumenzament da l'onn 2015 stat a disposiziun al departament presidial in servetsch presidial ch'è affilià a la Chanzlia federala. Quest servetsch presidial è vegnì installà sin basa d'in conclus dal parlament dals 28 da settember 2012. La basa legala furma la Lescha davart l'organisaziun da la regenza e da l'administraziun (LORA).

Quest servetsch che sustegna il departament presidial tar las incumbensas che vegnan chaschunadas supplementarmain durant l'onn presidial concentrescha en spezial las prestaziuns che la Chanzlia federala (ChF) furnescha dapi in temp pli lung e talas dal Departament federal d'affars exteriurs (DFAE). L'incumbensa centrala dal servetsch presidial è quella da cussegliar la presidenta u il president da la Confederaziun en dumondas da la politica exteriura. Ina tala cussegliaziun devi gia pli baud; ella vegniva fatga dal sectur "Fatschentas presidialas" dal Secretariat da stadi. Anc pli baud vegniva delegà in diplomat en il departament presidial. Il parlament e la regenza spetgan dal servetsch presidial ch'i sa laschian concentrar là experientscha, enconuschientschas spezialas e contacts per installar uschia ina memoria instituziunala – en il senn da la cuntinuitad, ma er da l'effizienza. 

Ultima midada 15.06.2020

Tar il cumenzament da la pagina

https://www.admin.ch/content/gov/rm/pagina-iniziala/presidi-confederaziun/onn-presidial-2020.html