Onn presidial 2019

President da la Confederaziun 2019 è il Turitgais Ueli Maurer. El è vegnì elegì en quest uffizi ils 5 da december 2018.

Il president da la Confederaziun Ueli Maurer e Simonetta Sommaruga, vicepresidenta dal Cussegl federal, en la sala dal Cussegl naziunal (fotografia: Béatrice Devènes)

Per l’emprima giada dapi l’onn 2012 ha il Departament federal da finanzas (DFF) puspè la funcziun da departament presidial. Vicepresidenta dal Cussegl federal l’onn 2019 è Simonetta Sommaruga. Ella maina il Departament federal per ambient, traffic, energia e communicaziun (DATEC).

*** 

„Quai duai la populaziun sentir: che qua lavuran persunas ch’emprovan cun plaschair da cuntanscher il maximum per noss pajais. Che nus avain qua differentas opiniuns è bain dal tuttafatg cler. Quai sto esser uschia. Dentant pretendan ins er da nus, che nus chattian insanua a la fin dal di in cumpromiss ubain ina maioritad che sustegna tals projects. Jau pens ch’igl è l’incumbensa da nus tuts d’etablir cun la populaziun ina relaziun plain confidenza e da la pertgirar.”

(Or dal pled dal cusseglier federal Ueli Maurer ils 5 da december 2018 davant l'Assamblea federala plenara)

Las allocuziuns dal president da la Confederaziun vegnan publitgadas sin la pagina d’internet da ses departament, il Departament federal da finanzas (DFF).

Servetsch presidial

Dapi il cumenzament da l'onn 2015 stat a disposiziun al departament presidial in servetsch presidial ch'è affilià a la Chanzlia federala. Quest servetsch presidial è vegnì installà sin basa d'in conclus dal parlament dals 28 da settember 2012. La basa legala furma la Lescha davart l'organisaziun da la regenza e da l'administraziun (LORA).

Quest servetsch che sustegna il departament presidial tar las incumbensas che vegnan chaschunadas supplementarmain durant l'onn presidial concentrescha en spezial las prestaziuns che la Chanzlia federala (ChF) furnescha dapi in temp pli lung e talas dal Departament federal d'affars exteriurs (DFAE). L'incumbensa centrala dal servetsch presidial è quella da cussegliar la presidenta u il president da la Confederaziun en dumondas da la politica exteriura. Ina tala cussegliaziun devi gia pli baud; ella vegniva fatga dal sectur "Fatschentas presidialas" dal Secretariat da stadi. Anc pli baud vegniva delegà in diplomat en il departament presidial. Il parlament e la regenza spetgan dal servetsch presidial ch'i sa laschian concentrar là experientscha, enconuschientschas spezialas e contacts per installar uschia ina memoria instituziunala – en il senn da la cuntinuitad, ma er da l'effizienza. 

Ultima midada 13.02.2019

Tar il cumenzament da la pagina

https://www.admin.ch/content/gov/rm/pagina-iniziala/presidi-confederaziun/onn-presidial-2019.html