Onn presidial 2018

President da la Confederaziun 2018 è il socialdemocrat friburgais Alain Berset. El è vegnì elegì ils 6 da december 2017.

Il president da la Confederaziun Alain Berset e Ueli Maurer, vicepresident dal Cussegl federal, en la sala dal Cussegl naziunal (Keystone/Peter Klaunzer)

Per l’emprima giada dapi l’onn 2008 ha il Departament federal da l’intern (DFI) la funcziun da departament presidial. Vicepresident dal Cussegl federal l’onn 2018 è il Turitgais Ueli Maurer. El maina il Departament federal da finanzas (DFF).

*** 

„La Svizra n’è betg in pajais dal maximalissem politic. Nagin na po furmar la Svizra tenor sias atgnas concepziuns. La Svizra n’è dentant er betg in pajais dal minimalissem politic. Nus savain che noss engaschi per garantir la coesiun naziunala e la giustia sociala è indispensabel e na duai mai ceder. Quai è la clav da noss success.”

(Or dal pled dal cusseglier federal Alain Berset ils 6 da december 2017 davant l'Assamblea federala plenara)

Las allocuziuns dal president da la Confederaziun èn preschentadas sin las paginas da ses departament, il Departament federal da l’intern (DFI).

Servetsch presidial

Dapi il cumenzament da l'onn 2015 stat a disposiziun al departament presidial in servetsch presidial ch'è affilià a la Chanzlia federala. Quest servetsch presidial è vegnì installà sin basa d'in conclus dal parlament dals 28 da settember 2012. La basa legala furma la Lescha davart l'organisaziun da la regenza e da l'administraziun (LORA).

Quest servetsch che sustegna il departament presidial tar las incumbensas che vegnan chaschunadas supplementarmain durant l'onn presidial concentrescha en spezial las prestaziuns che la Chanzlia federala (ChF) furnescha dapi in temp pli lung e talas dal Departament federal d'affars exteriurs (DFAE). L'incumbensa centrala dal servetsch presidial è quella da cussegliar la presidenta u il president da la Confederaziun en dumondas da la politica exteriura. Ina tala cussegliaziun devi gia pli baud; ella vegniva fatga dal sectur "Fatschentas presidialas" dal Secretariat da stadi. Anc pli baud vegniva delegà in diplomat en il departament presidial. Il parlament e la regenza spetgan dal servetsch presidial ch'i sa laschian concentrar là experientscha, enconuschientschas spezialas e contacts per installar uschia ina memoria instituziunala – en il senn da la cuntinuitad, ma er da l'effizienza. 

Ultima midada 03.01.2018

Tar il cumenzament da la pagina

https://www.admin.ch/content/gov/rm/pagina-iniziala/presidi-confederaziun/onn-presidial-2018.html