Ils 9 da zercladur 2024 vegn la populaziun a votar davart l'iniziativa dal pievel per la libertad e l'integritad corporala.
Curtamain
La primavaira 2020 è la pandemia da corona arrivada en Svizra. Il Cussegl federal ha prendì mesiras per part rigurusas per proteger la populaziun cunter il virus e per evitar ch'il sectur da sanadad, cunzunt ils ospitals, vegnia surchargià. A medem temp han perscrutadras e perscrutaders sin tut il mund cumenzà a sviluppar vaccins cunter il nov virus. Bleras parts da la populaziun han gì grondas speranzas en quests vaccins ed en la vaccinaziun sco via or da la pandemia. Auters han gì ina tenuta negativa envers la vaccinaziun. En quest ambient politic e social è questa iniziativa vegnida lantschada l'atun 2020.
L'iniziativa pretenda che la persuna pertutgada dettia ses consentiment ad intervenziuns en l'integritad corporala u spiertala. Gia oz è l'integritad corporala e spiertala francada en la constituziun. Quest dretg fundamental protegia il corp cunter l'influenza dal stadi. Tenor l'iniziativa na dastga ina persuna, che refusa da dar ses consentiment, ni vegnir chastiada ni vegnir dischavantagiada. Il text da l'iniziativa na discurra betg da «vaccinaziuns», mabain en general dad «intervenziuns en l'integritad corporala e spiertala». El cumpiglia pia da princip tut las acziuns da la Confederaziun, dals chantuns e da las vischnancas, che han ina influenza sin il corp, per exempel la lavur da la polizia e l'execuziun da chastis. Tge consequenzas concretas che quai avess, sche l'iniziativa vegniss acceptada, dependess da la realisaziun e da la giurisdicziun.
Dumonda da votaziun:
Vulais Vus acceptar l'iniziativa dal pievel «Per la libertad e l'integritad corporala»?
Recumandaziun dal Cussegl federal e dal parlament
Il Cussegl federal ed il parlament refusan l'iniziativa, perquai che sia finamira centrala, l'integritad corporala, è gia francada sco dretg fundamental en la constituziun. Gia oz na dastga nagin vegnir vaccinà senza ses consentiment. Plinavant n'èsi betg cler, tge consequenzas che l'iniziativa avess per la lavur da la polizia e da la giustia.
Recumandaziun dal comité d'iniziativa
Per il comité d'iniziativa vai per pudair decider vinavant libramain davart l'agen corp. Il corp saja l'ultima bastiun da la libertad. L'uman saja mo liber, sch'el possia decider, tge ch'entra en ses corp. En questa dumonda na possian ins betg sa fidar da la politica.
Ultima midada 26.04.2024