Ils 15 da matg 2022 vegn la populaziun a votar davart la Midada da la Lescha da transplantaziun.
Curtamain
Durant ils ultims tschintg onns han en media var 450 persunas per onn survegnì en Svizra in u plirs organs d’ina persuna defuncta. La dumonda per organs è dentant bler pli gronda. Ina transplantaziun è ozendi mo pussaivla, sche la persuna defuncta ha dà il consentiment a la donaziun durant sia vita (model dal consentiment explicit). La voluntad da la persuna n’è però savens betg enconuschenta. Lura ston ils confamigliars decider. En la gronda part dals cas s’expriman els cunter ina donaziun d’organs.
Il Cussegl federal ed il parlament vulessan augmentar la schanza da pazientas e pazients da survegnir in organ. Els vulan perquai reglar da nov las donaziuns d’organs: Tgi che na vul betg far ina donaziun da ses organs, sto documentar quai durant sia vita (model dal consentiment presumà).
Sch’ina persuna n’è betg s’opponida, partan ins dal fatg ch’ella veglia far ina donaziun da ses organs. Tuttina vegnan en quest cas dumandads ils confamigliars. Els pon refusar ina donaziun d’organs, sch’els san u supponan che la persuna pertutgada fiss sa decidida cunter ina donaziun. Sche nagin dals confamigliars n’è cuntanschibel, na dastgan nagins organs vegnir prelevads. La midada da la Lescha da transplantaziun è ina cuntraproposta indirecta a l’iniziativa dal pievel «Promover la donaziun d’organs e salvar vitas». Er l’iniziativa dal pievel pretenda da midar al model dal consentiment presumà, na regla dentant betg la rolla dals confamigliars.
Ella è vegnida retratga sut la cundiziun che la midada da la Lescha da transplantaziun entria en vigur. Perquai ch’igl ha dà in referendum cunter la lescha, vegn il project suttamess al pievel.
Dumondada votaziun:
Vulais Vus acceptar la midada dal 1. d’october 2021 da la Lescha federala davart la transplantaziun d’organs, da tessids e da cellas (Lescha da transplantaziun)?
Recumandaziun dal Cussegl federal e dal parlament
Ina donaziun d’organs po salvar vitas. Per il Cussegl federal èsi perquai impurtant ch’ils organs da tut quellas persunas che pon e vulan far ina donaziun suenter lur mort vegnian er propi transplantads. La nova procedura garantescha ch’ils confamigliars vegnan dumandads ed als distgargia en ina situaziun difficila.
Recumandaziun dal comité da referendum
Tenor il comité datti – cun la nova lescha – adina persunasche na san betg, ch’ellas stuessan s’exprimer cunter ina donaziun d’organs. Uschia vegnia acceptà ch’i vegnian prelevads organs d’umans cunter lur voluntad. Quai violeschia il dretg d’autodeterminaziun e d’integritad corporala.
Ultima midada 14.03.2022
