Ils 15 da matg 2022 vegn la populaziun a votar davart la Midada da la Lescha da films.
Curtamain
Ils emetturs da televisiun svizzers èn obligads d’investir 4 pertschient da lur svieuta en la cinematografia svizra. Uschia prestan els ina contribuziun impurtanta a favur da la producziun da films indigena. Films e serias vegnan dentant adina pli bsavens er purschids en l’internet sin dumonda (streaming). Per ils servetschs da streaming ch’èn activs sin plaun internaziunal na datti fin ussa nagina obligaziun d’investiziun en Svizra.
La midada da la Lescha da films prevesa ch’ils servetschs da streaming ston en l’avegnir medemamain investir 4 pertschient da la svieuta realisada en Svizra en la cinematografia indigena. Els pon ubain sa participar directamain a producziuns svizras da films u da serias ubain pajar ina taxa da cumpensaziun che va a favur da la promoziun dal film svizzer. Ultra da quai sto la purschida dal servetsch da streaming sa cumponer da 30 pertschient serias u films ch’èn vegnids producids en l’Europa. Cunter questa midada da la lescha èsi vegnì fatg in referendum.
Dumonda da votaziun:
Vulais Vus acceptar la midada dal 1. d’october 2021 da la Lescha federala davart la producziun e la cultura da films (Lescha da films, LFi)?
Recumandaziun dal Cussegl federal e dal parlament
Per il Cussegl federal ed il parlament serra la midada da la lescha ina largia ch’è resultada tras la transfurmaziun digitala. Ella eliminescha il tractament inegual d’emetturs da televisiun e da servetschs da streaming, rinforza nossa cinematografia e contribuescha a la diversitad culturala da la purschida digitala che daventa adina pli impurtanta.
Recumandaziun dal comité da referendum
Per il comité da referendum n’èsi betg gist che la midada da la lescha sforza ils servetschs da streaming da mussar 30 pertschient films europeics. Films appreziads da l’entir mund tirassan uschia la curta. Plinavant è il comité persvadì ch’ils abunaments per servetschs da streaming vegnissan pli chars pervia da l’obligaziun d’investiziun.
Ultima midada 13.04.2022
