Iniziativa dal pievel per aua da baiver netta e vivonda sauna

Ils 13 da zercladur 2021 ha la populaziun votà davart l'iniziativa federala dal pievel per aua da baiver netta e vivonda sauna.

Curtamain

Per che las puras ed ils purs survegnian pajaments directs da la Confederaziun, ston els ademplir ina retscha da cundi-ziuns concernent l’ambient. Questa uschenumnada cumprova da prestaziun ecologica cumpiglia tranter auter cundiziuns concernent la protecziun da las plantas, la ladada, la tegnida d’animals e la biodiversitad. Al comité d’iniziativa na van questas cundiziuns betg lunsch avunda. A ses avis sustegnan ils pajaments directs in’agricultura che donnegia l’ambient e l’aua da baiver. 

L’iniziativa vul proteger meglier l’ambient e l’aua da baiver. Pajaments directs duain vegnir pajads mo pli sut las suandantas premissas: manaschis agriculs ston producir senza pesticids, en la tegnida d’animals na dastgan els duvrar antibiotica ni en moda preventiva ni en moda regulara, ed els ston esser en cas da nutrir lur animals mo cun pavel ch’els produceschan sezs. Uschia duai vegnir impedì ch’i resultia memia blera grascha e puschina. Er la perscrutaziun, la cussegliaziun e la scolaziun agricula duain s’orientar tenor questas finamiras. L’iniziativa pudess avair per consequenza che la producziun en Svizra daventa pli pitschna. En quest cas stuessan vegnir importadas dapli victualias per avair avunda nutriment per la populaziun svizra. Nagins effects n’avess l’iniziativa per manaschis agriculs che na survegnan nagins pajaments directs.- 

Dumonda da votaziun:  

Vulais Vus acceptar l’iniziativa dal pievel «Per aua da baiver netta e vivonda sauna – Naginas subvenziuns per l’utilisaziun da pesticids ed il diever profilactic d’antibiotica»?

Recumandaziun dal Cussegl federal e dal parlament

Al Cussegl federal ed al parlament va l’iniziativa memia lunsch. La consequenza fiss quella che blers manaschis agriculs producissan main victualias. L’import da victualias creschiss, contaminaziuns da l’ambient vegnissan spustadas uschia a l’exteriur. Il parlament ha ultra da quai gia resguardà il giavisch central da l’iniziativa.

Recumandaziun dal comité d’iniziativa

Per il comité violescha la politica agrara actuala il dretg sin aua da baiver netta. Quella saja periclitada pervia dal diever enorm da pesticids, da memia blera antibiotica e da memia blera puschina. Perquai che quests donns da l’ambient e questas ristgas da la sanadad vegnissan finanziads cun daners da taglia, saja necessari d’orientar da nov las subvenziuns.

81 Ja 107 Nein 7 Enthaltungen 9 Ja 31 Nein 4 Enthaltungen

Ultima midada 22.04.2021

Tar il cumenzament da la pagina

L’app da votaziun da la Confederaziun e dals chantuns: 

https://www.admin.ch/content/gov/rm/pagina-iniziala/documentaziun/votaziuns/20210613/iniziativa-dal-pievel-per-aua-da-baiver-netta-e-vivonda-sauna.html