Cunvegna davart il partenadi economic cun l’Indonesia

Ils 7 da mars 2021 vegn la populaziun a votar davart la Cunvegna davart il partenadi economic cun l’Indonesia.

Curtamain

Las interpresas svizras èn dependentas d’exports e darelaziuns economicas fidadas. Per garantir e meglierar ad ellas l’access als martgads da l’exteriur, tgira la Svizra ina vasta rait da cunvegnas cun pajais partenaris. Oz engrevgeschan autsdazis ed autras barrieras il commerzi cun l’Indonesia, il pajais il quart grond dal mund, en quai che concerna la populaziun. Perquai ha la Svizra er negozià ina cunvegna cun l’Indonesia. Cunter quai è vegnì fatg in referendum. Crititgà vegni en spezial che la Svizra reduceschia sut tschertas circumstanzas ils dazis per l’ieli da palmas.

La cunvegna prevesa che tut ils bains impurtants svizzers possian vegnir exportads senza dazis en l’Indonesia. Per las interpresas svizras sin il martgà creschent da l’Indonesia procura ella per ina situaziun da partenza almain uschè buna sco quella da lur concurrenza estra. Da l’autra vart abolescha la Svizra ils dazis per products industrials da l’Indonesia. Ils dazis per products agriculs percunter abolescha ella mo per part, quai per proteger l’agricultura svizra. L’Indonesia e la Svizra s’obligheschan d’avair in commerzi che resguarda in svilup duraivel. Per importar ieli da palmas da l’Indonesia prevesa la cunvegna tschertas reducziuns dal dazi per ina quantitad limitada. Tgiche vul importar ieli da palmas sut questas cundiziuns, sto cumprovar che quel è vegnì producì sut las cundiziuns ecologicas e socialas fixadas.

Dumonda da votaziun 

Vulais Vus acceptar il conclus federal dals 20 da december 2019 davart l’approvaziun da la Cunvegna cumplessiva davart il partenadi economic tranter ils stadis dala AECL e l’Indonesia?

Recumandaziun dal Cussegl federal e dal parlament

Tenor il Cussegl federal ed il parlament sa tracti d’inacunvegna impurtanta ed equilibrada. Ella resguardia tant ils interess economics da tuts dus pajais sco er la finamira d’obtegnair in svilup duraivel. Mo l’ieli da palmas producì en moda persistenta po vegnir importà sut las cundiziuns pli avantagiusas da la cunvegna.

Recumandaziun dal comité da referendum

Tenor il comité da referendum na po strusch vegnir ademplida l’empermischun da la durabilitad ch’è colliada cun lacunvegna. Per quest intent manchian pussaivladads efficaziasda controlla e da sancziun. L’ieli da palmas bunmartgà chaschunia la destrucziun da guauds primitivs e concurrenzeschia per exempel l’ieli da flur-sulegl e l’ieli da ravun en Svizra.

Ultima midada 22.02.2021

Tar il cumenzament da la pagina

L’app da votaziun da la Confederaziun e dals chantuns: 

https://www.admin.ch/content/gov/rm/pagina-iniziala/documentaziun/votaziuns/20210307/cunvegna-davart-il-partenadi-economic-cun-l-indonesia.html