Iniziativa dal pievel «Per interpresas responsablas – per proteger ils umans e l’ambient»

Ils 29 da november 2020 vegn la populaziun a votar davart l'iniziativa dal pievel «Per interpresas responsablas – per proteger ils umans e l’ambient».

Curtamain

Dad interpresas svizras vegni spetgà ch’ellas observian ils dretgs umans ed ils standards ecologics er a l’exteriur. La Svizra è sa participada activamain a l’elavuraziun da standards inter- naziunals unitars ed ha prendì mesiras per realisar tals. Per las iniziantas ed ils iniziants na van questas mesiras dentant betg lunsch avunda. Perquai han els lantschà l’iniziativa dal pievel «Per interpresas responsablas – per proteger ils umans e l’ambient» che prevesa novas obligaziuns legalas per interpresas svizras.

L’iniziativa pretenda che interpresas svizras examineschian, sch’ils dretgs umans renconuschids sin plaun internaziunal ed ils standards ecologics vegnian observads en il rom da lur activitad commerziala er a l’exteriur. En quest connex na ston ellas betg mo examinar lur atgna activitad, mabain er quella da lur interpresas affiliadas, da lur furniturs e da lur partenaris da fatschenta. Sche necessari ston ellas prender mesiras e dar pled e fatg. Plinavant duain interpresas svizras da nov star bunas er per donns che vegnan chaschunads d’interpresas ch’ellas controllan. Ellas èn liberadas da questa responsabladad, sch’ellas pon cumprovar ch’ellas han observà las obligaziuns d’examinar il quità. Il parlament ha deliberà ina cuntraproposta indirecta a l’iniziativa. Er quella prevesa novas obligaziuns da dar pled e fatg e d’examinar il quità. Cuntravenziuns vegnan chastiadas cun ina multa. La cuntraproposta entra en vigur, sche l’iniziativa vegn refusada e sche la cuntraproposta na vegn betg cumbattida tras in eventual referendum.

Dumanda da votaziun: 

Vulais Vus acceptar l’iniziativa dal pievel «Per interpresas responsablas – per proteger ils umans e l’ambient»?

Recumandaziun dal Cussegl federal e dal parlament

Ord vista dal Cussegl federal e dal parlament van en speziallas reglas da responsabladad da l’iniziativa memia lunsch. L’iniziativa chaschuna malsegirezza giuridica e periclitescha plazzas da lavur sco er la bainstanza. Novas obligaziuns da dar pled e fatg e d’examinar il quità ston esser accordadas sin plaun internaziunal. Uschia è quai previs en la cuntraproposta indirecta.

Recumandaziun dal comité d’iniziativa

Tenor il comité sa chapeschi per la pli gronda part da las interpresas svizras da sez ch’ellas observan ils dretgs umans ed ils standards ecologics. Ma interpresas che tolereschan la lavur d’uffants u che tissientan flums, duain da nov star bunas per quai tenor il dretg svizzer. Mancanza da resguard na dastgia betg esser in avantatg da concurrenza.

Ultima midada 05.10.2020

Tar il cumenzament da la pagina

L’app da votaziun da la Confederaziun e dals chantuns: 

https://www.admin.ch/content/gov/rm/pagina-iniziala/documentaziun/votaziuns/20201129/iniziativa-dal-pilevel-per-interpresas-responsablas-per-proteger-ils-umans-e-l-ambient.html