Iniziativa dal pievel «Per in scumond da finanziarils producents da material da guerra»

Ils 29 da november 2020 vegn la populaziun a votar davart l'iniziativa dal pievel «Per in scumond da finanziarils producents da material da guerra».

Curtamain

Sco la gronda part dals pajais è er la Svizra involvida en la producziun da material da guerra. D’ina vart produceschan interpresas svizras armas u cumponentas d’armas. Da l’autra vart gidan investiders svizzers a finanziar producents da material da guerra en Svizra ed a l’exteriur. Per il material da guerra valan prescripziuns severas en Svizra. La producziun e l’export dovran ina permissiun. Armas atomaras, biologicas e chemicas, muniziun a fragmentaziun e minas cunter persunas èn scumandadas. Er la producziun ed il commerzi cun talas armas èn scumandads. Plinavant èsi scumandà da finanziar la producziun da talas armas (scumond da finanziaziun).

Per il comité d’iniziativa na va quest scumond da finanziaziun betg lunsch avunda. El vul scumandar la finanziaziun da tut il material da guerra. Uschia fissi lura per exempel er scumandà da finanziar la producziun da schluppets d’assagl, da chars armads e da lur cumponentas. Il scumond na duai betg mo cumpigliar la concessiun da credits a producents da material da guerra, mabain er il possess da lur aczias e da products d’investiziun, sco fonds che cumpiglian aczias da quests producents. Pertutgadas dal scumond fissan la Banca naziunala svizra, las fundaziuns, la AVS/AI e las cassas da pensiun. Plinavant duai la Svizra s’engaschar sin plaun internaziunal, per che quest scumond da finanziaziun valia er per las bancas e per las assicuranzas. Pertutgads economicamain na fissan betg mo concerns d’armament, mabain er manaschis da furniziun, tranter quels bleras interpresas pitschnas e mesaunas (IPM).

Dumonda da votaziun:

Vulais Vus acceptar l’iniziativa dal pievel «Per in scumond da finanziar ils producents da material da guerra»?

Recumandaziun dal Cussegl federal e dal parlament

Per il Cussegl federal e per il parlament ademplescha il scumond da finanziaziun existent ses intent. L’iniziativa va cleramain memia lunsch e na vegn betg ad impedir guerras. Ella sminuiss dentant las renditas da la AVS/AI e da las cassas da pensiun, periclitass la Svizra sco plazza da finanzas ed indebliss l’industria svizra cun sias IPM.

Recumandaziun dal comité d’iniziativa

Armas pon chaschunar grondas suffrientschas. Ord vista dal comité d’iniziativa èsi perquai nunetic, sche daners d’instituts da finanzas svizzers vegnan impundids per producir armas. Las cassas da pensiun pudessan er realisar ina rendita confurma al martgà, sch’ellas n’investissan betg en interpresas d’armament.

Ultima midada 27.10.2020

Tar il cumenzament da la pagina

L’app da votaziun da la Confederaziun e dals chantuns: 

https://www.admin.ch/content/gov/rm/pagina-iniziala/documentaziun/votaziuns/20201129/iniziativa-dal-pievel-Per-in-scumond-da-finanziarils-producents-da-material-da-guerra.html