Midada da la Lescha davart l’urden da cumpensaziun dal gudogn

Ils 27 da settember 2020 votescha la populaziun davart la Midada da la Lescha davart l’urden da cumpensaziun dal gudogn (cuntraproposta indirecta a l’iniziativa dal pievel «Per in congedi da paternitad raschunaivel – a favur da tut la famiglia»).    

Curtamain

Suenter la naschientscha da lur uffant han mammas cun activitad da gudogn in dretg legal da 14 emnas congedi da maternitad pajà. Babs percunter han tenor la lescha in dretg dad 1 u da 2 dis libers.

Il project prevesa d’introducir in congedi da paternitad pajà da 2 emnas. El po vegnir retratg entaifer 6 mais suenter la naschientscha. La perdita da gudogn durant il congedi da paternitad vegn indemnisada. L’indemnisaziun vegn fixada en la medema moda e maniera sco tar dunnas en congedi da maternitad: Ella importa 80 pertschient da las entradas da gudogn mesaunas avant la naschientscha da l’uffant, maximalmain però 196 francs per di. L’Uffizi federal d’assicuranzas socialas stima ils custs dal congedi da paternitad da 2 emnas sin var 230 milliuns francs per onn il mument ch’il project entra en vigur. Finanziads vegnan quests custs – sco tar il congedi da maternitad – sur l'urden da cumpensaziun dal gudogn (UCG), pia en emprima lingia cun contribuziuns da las persunas cun activitad da gudogn e dals patruns. Il project è ina cuntraproposta indirecta dal parlament a l’iniziativa dal pievel «Per in congedi da paternitad raschunaivel – a favur da tut la famiglia». L’iniziativa pretenda in congedi da paternitad da 4 emnas. Ella è vegnida retratga sut la cundiziun ch’il project per in congedi da paternitad da 2 emnas entria en vigur. Perquai ch’igl ha dà in referendum cunter quest project, stoi vegnir votà davart el.

 
 

Dumonda da votaziun:

Vulais Vus acceptar la midada dals 27 da settember 2019 da la Lescha federala davart l’urden da cumpensaziun dal gudogn per persunas che prestan servetsch ed en cas d’ina maternitad (Lescha davart l’urden da cumpensaziun dal gudogn, LCG)?
 
 

Recumandaziun dal Cussegl federal e dal parlament

Il Cussegl federal ed il parlament beneventan in congedi da paternitad pajà da 2 emnas. Quel facilitescha la participaziun dal bab a la tgira da ses uffant e distgargia la mamma. El correspunda ad in giavisch fitg derasà e na chaschuna betg custs finanzials sproporziunads u ina gronda lavur organisatorica.

 
 

Recumandaziun dal comité da referendum

Per il comité è il congedi da paternitad pajà ina nova assicuranza sociala ch’è chara, irresponsabla ed abusiva. A tuts restia main dal salari, perquai ch’els stoppian pajar las vacanzas d’in pèr paucs. Per interpresas pitschnas e mesaunas (IPM) na saja il congedi da paternitad da 2 emnas betg supportabel, ni finanzialmain ni organisatoricamain.

 
 

Ultima midada 14.08.2020

Tar il cumenzament da la pagina

L’app da votaziun da la Confederaziun e dals chantuns:

 
 
https://www.admin.ch/content/gov/rm/pagina-iniziala/documentaziun/votaziuns/20200927/midada-da-la-lescha-davart-l-urden-da-cumpensaziun-dal-gudogn.html