Mesemna, ils 12 d'october 2022, tegna il Cussegl federal ina sesida extra muros en il chantun Grischun. Suenter la sesida sa scuntran las cusseglieras federalas ed ils cussegliers federals cun la populaziun grischuna e cun la Regenza chantunala en il center dal vitg da Müstair. Dapi l'onn 2010 è quai la 17avla giada che la sesida emnila dal Cussegl federal ha lieu ordaifer la Chasa federala, en in auter chantun.
Il Cussegl federal vul exprimer sia colliaziun cun tut las regiuns da la Svizra. Perquai ha el cumenzà la stad 2010 a tegnair sesidas ordaifer la Chasa federala e da sa scuntrar cun la populaziun dals singuls chantuns ch'el visita. Suenter ch'el ha visità il 2010 il Tessin ed il Giura, il 2011 ils chantuns Uri, Vallais e Basilea-Citad, il 2012 Schaffusa, il 2013 Vad, il 2014 Sviz, il 2015 Friburg, il 2016 ils chantuns Vad e Glaruna, il 2017 Soloturn, il 2018 Son Gagl, il 2019 Turitg, il 2021 Lucerna (suenter ina pausa pervia da COVID-19), e l'avrigl passà Genevra, tegna il Cussegl federal sia 17avla sesida extra muros ils 12 d'october 2022 en il chantun Grischun. Tschernì questa destinaziun ha il president da la Confederaziun Ignazio Cassis che deditgescha ses onn presidial a l'innovaziun ed a la diversitad. Il Grischun è il sulet chantun triling da la Svizra.
Suenter sia sesida en la claustra benedictina Son Jon, che fa part dal Patrimoni mundial da l'UNESCO, sa scuntra il Cussegl federal cun la populaziun da la regiun ad in aperitiv en il center dal vitg da Müstair, betg lunsch davent dal cunfin cun l'Italia. La Regenza chantunala e la vischnanca envidan il Cussegl federal e la populaziun a quest aperitiv. La scuntrada cumenza suenter la sesida dal Cussegl federal, enturn las 11.30, e dura circa in'ura. Silsuenter sa rendan il Cussegl federal e las autoritads grischunas ad in gentar cuminaivel.
Remartga per las medias
Las represchentantas ed ils represchentants da las medias vegnan envidads ad ina curta conferenza da pressa cun il president da la Confederaziun Ignazio Cassis directamain suenter l'arriv dal Cussegl federal a Müstair. La conferenza da pressa ha lieu en la claustra Son Jon a Müstair,
mesemna, ils 12 d'october 2022, circa a las 9.00 (durada: circa 15 minutas).
Lieu ed uras: curt da la claustra Son Jon a partir da las 8.15.
Las represchentantas ed ils represchentantas da las medias interessadas vegnan supplitgads da prender cun sai lur carta da pressa sco er ina carta d'identitad e d'annunziar lur participaziun a la conferenza da pressa fin il pli tard mardi, ils 11 d'october, a las 10.00, a la Chanzlia federala (infokomm@bk.admin.ch, tel. 058 462 37 91).
Las represchentantas ed ils represchentants da las medias èn medemamain envidads a l'aperitiv cun la populaziun grischuna a Müstair, circa a partir da las 11.30.
En quest rom pon vegnir fatgas fotografias. Perquai ch'il temp è però fitg limità e perquai ch'il contact cun la populaziun grischuna ha prioritad, vegnan las medias supplitgadas da betg far intervistas cun las commembras ed ils commembers dal Cussegl federal durant l'aperitiv. Per quest motiv è dal reminent prevesida ina curtan conferenza da pressa avant la sesida.
Ulteriuras infurmaziuns: Claude Gerbex, incumbensà d’infurmaziun per las fatschentas dal Cussegl federal, Tel: +41 58 462 37 09
Departament responsabel: Chanzlia federala
Ultima midada 29.09.2022
