Il Departament federal da finanzas (DFF)

Il Departament federal da finanzas (DFF) s'occupa spezialmain da las finanzas publicas e da dumondas da taglia. Manà vegn el dapi il cumenzament da l'onn 2023 da Karin Keller-Sutter. 

Scheffa dal DFF Karin Keller-Sutter (KEYSTONE Christian Beutler).

Cussegliera federala Karin Keller-Sutter

Karin Keller-Sutter è naschida l’onn 1963. Ella è oriunda dal chantun Son Gagl. La scola ha ella frequentà a Wil ed a Neuchâtel. Da professiun è Karin Keller-Sutter translatura/interpreta e scolasta da scola media. Da l’onn 1989 fin l’onn 2000 ha ella lavurà sco translatura independenta e sco docenta ad ina scola professiunala. Karin Keller-Sutter è maridada.

Karin Keller-Sutter ha cumenzà sia carriera politica l’onn 1992 sco cussegliera communala a Wil. L’onn 1996 è ella vegnida elegida en il parlament chantunal e l’onn 2000 en la regenza chantunala. Sco cussegliera guvernativa ha ella presidià il Departament da giustia e da segirezza. L’onn 2011 è Karin Keller-Sutter vegnida elegida sco represchentanta dal chantun Son Gagl en il Cussegl dals chantuns. L’onn 2017/2018 ha ella presidià il Cussegl dals chantuns. 

Karin Keller-Sutter è plinavant stada activa en differents cussegls d’administraziun e da fundaziun.

Elecziun en il Cussegl federal

Ils 5 da december 2018 ha l’Assamblea federala elegì Karin Keller-Sutter en il Cussegl federal. Da 2019 fin 2022 ha el manà il Departament federal da giustia e polizia (DFGP). Dapi il 1. da schaner 2023 dirigia el il Departament federal da finanzas.

Il Departament federal da finanzas (DFF)

Il DFF sa deditgescha ad in grond dumber d'incumbensas. Da quellas fan part il preventiv federal, dumondas da finanzas, da valutas e da taglia dal sectur naziunal ed internaziunal, la controlla da duana e da rauba e la realisaziun da la legislaziun davart l'alcohol. Vitiers vegnan servetschs per l'entira administraziun federala, da l'informatica al persunal fin via a l'infrastructura ed a la logistica.  

Cifras pertutgant il DFF

Plazzas a temp cumplain (2022): 8'756

Tenor il preventiv quinta il DFF per l'onn 2022 cun custs da 17,86 milliardas francs.

 
 
 

Ultima midada 29.12.2023

Tar il cumenzament da la pagina

https://www.admin.ch/content/gov/rm/pagina-iniziala/departaments/departament-finanzas-dff.html