Il Departament federal da defensiun, protecziun da la populaziun e sport (DDPS) s'occupa principalmain da dumondas militaras. Manà vegn el dapi il cumenzament da l'onn 2019 da Viola Amherd.
Cussegliera federala Viola Amherd
Viola Amherd è naschida l’onn 1962 ed è creschida si a Brig-Glis. Ella ha frequentà il collegi a Brig ed ha studegià scienzas dal dretg a l’Universitad da Friburg. L’onn 1991 ha ella obtegnì la patenta d’advocata dal chantun Vallais. Dapi lura ha ella lavurà sco advocata e notara independenta a Brig-Glis. Viola Amherd è nubila.
Viola Amherd ha cumenzà sia carriera politica l’onn 1992 en l’executiva da Brig-Glis. Da l’onn 2000 fin l’onn 2012 è ella stada presidenta da la citad da Brig. L’onn 2005 è ella vegnida elegida en il Cussegl naziunal. Da l’onn 2011 fin a sia elecziun en il Cussegl federal è ella stada vicepresidenta da la fracziun da la PCD en il parlament.
Viola Amherd ha plinavant occupà differents mandats administrativs ed è stada activa en associaziuns ed uniuns.
Elecziun en il Cussegl federal
Ils 5 da december 2018 ha l’Assamblea federala plenara elegì Viola Amherd en il Cussegl federal. Ella maina dapi il schaner 2019 il DDPS.
Il Departament federal da defensiun, protecziun da la populaziun e sport (DDPS)
En connex cun il DDPS pensan blers a l'armada ed al militar. Il departament na sa lascha dentant betg limitar al chavazzin "defensiun". Anzi, el ha blers aspects. Dal DDPS fan part er ils ulteriurs secturs ch'al dattan il num "protecziun da la populaziun" e "sport" sco er il servetsch d'infurmaziun da la Confederaziun. Vitiers vegn armasuisse, il center da cumpetenza da la Confederaziun en spezial per l'acquisiziun da tecnologia cumplexa.
Cifras pertutgant il DDPS
Plazzas a temp cumplain (2020): 12'215
Tenor il preventiv quinta il DDPS per l'onn 2020 cun custs da 8,02 milliardas francs.
Ultima midada 27.12.2021
