Il Departament federal d'economia, furmaziun e retschertga (DEFR)

Il Departament federal d'economia, furmaziun e retschertga (DEFR) s'occupa da dumondas economicas, da la perscrutaziun e da la furmaziun. Dirigì vegn el dapi il november 2010 da Johann N. Schneider-Ammann.

Schef dal DEFR Johann N. Schneider-Ammann.

Il cusseglier federal Johann N. Schneider-Ammann

Il cusseglier federal Johann N. Schneider-Ammann è naschì ils 18 da favrer 1952 a Sumiswald (BE). El ha studegià electrotecnica a la SPF da Turitg ed ha terminà l'onn 1977 ses studi cun il diplom. Schneider-Ammann è maridà e bab da dus uffants creschids.

L'onn 1981 è Schneider-Ammann entrà en l'interpresa da maschinas da Langenthal che appartegna a la famiglia da sia dunna Katharina Schneider-Ammann. L'onn 1990 è el daventà il president da la Ammann Group. Suenter l'onn 1999 ha Schneider-Ammann presidià la federaziun d'industria da maschinas, d'electro e da metal da la Svizra, Swissmem; ultra da quai è el stà il vicepresident da la Federaziun da tetg da l'economia Economiesuisse.

Elecziun en il Cussegl federal

Johann N. Schneider-Ammann è stà cusseglier naziunal da la PLD ils onns 1999 e 2010. Ils 22 da settember 2010 ha l'Assamblea federala plenara elegì Schneider-Ammann en il Cussegl federal. Dapi il 1. da november 2010 è el il schef dal Departament federal d'economia, furmaziun e retschertga (DEFR).

Il Departament federal d'economia, furmaziun e retschertga (DEFR)

En il DEFR sa tracti per l'ina da dumondas da l'economia e da la politica da commerzi. Tar quest sectur tutga er la politica agrara. Per l'autra stattan ils secturs furmaziun, perscrutaziun ed innovaziun en il focus. Ultra da quai s’occupa il DEFR tranter auter er dals fatgs d'abitaziuns.     

Cifras pertutgant il DEFR

En il DEFR lavuran circa 2500 emploiadas ed emploiads federals.

Tenor il preventiv quinta il DEFR per l'onn 2015 cun custs dad 12,216 milliardas francs e cun in retgav da 365 milliuns francs.

Ultima midada 14.05.2018

Tar il cumenzament da la pagina

https://www.admin.ch/content/gov/rm/pagina-iniziala/departaments/departament-economia-furmaziun-retschertga-defr.html