Ils departaments
Ils departaments èn las pitgas centralas da l’administraziun federala. Ad els èn attribuids differents uffizis ed unitads administrativas. Els sustegnan il Cussegl federal tar la gestiun da las fatschentas da la regenza e la realisaziun da las leschas.
Il Departament federal d'affars exteriurs (DFAE)
Il Departament federal d'affars exteriurs (DFAE) represchenta la Svizra vers anora. Manà vegn el dapi 2017 da Ignazio Cassis.
Il Departament federal da l'intern (DFI)
Il Departament federal da l'intern (DFI) s'occupa principalmain da temas sco la AVS ed ils fatgs da sanadad. Manà vegn el dapi il cumenzament da l'onn 2024 dad Elisabeth Baume-Schneider.
Il Departament federal da giustia e polizia (DFGP)
Il Departament federal da giustia e polizia (DFGP) s'occupa da temas sco la segirezza interna, l'asil u la migraziun. Manà vegn il departament dapi il schaner 2024 da Beat Jans.
Il Departament federal da defensiun, protecziun da la populaziun e sport (DDPS)
Il Departament federal da defensiun, protecziun da la populaziun e sport (DDPS) è responsabel per la segirezza da la Svizra e da sia populaziun. Manà vegn el dapi 2025 da Martin Pfister.
Il Departament federal da finanzas (DFF)
Il Departament federal da finanzas (DFF) s'occupa spezialmain da las finanzas publicas e da dumondas da taglia. Manà vegn el dapi il cumenzament da l'onn 2023 da Karin Keller-Sutter.
Il Departament federal d'economia, furmaziun e retschertga (DEFR)
Il Departament federal d'economia, furmaziun e retschertga (DEFR) s'occupa da dumondas economicas, da la perscrutaziun e da la furmaziun. Dirigì vegn el dapi il schaner 2019 da Guy Parmelin.
Il Departament federal per ambient, traffic, energia e communicaziun (DATEC)
Il Departament federal per ambient, traffic, energia e communicaziun (DATEC) è il departament da l'infrastructura e da l'ambient. Manà vegn el dapi il schaner 2023 da Albert Rösti.
Las set commembras e commembers dal Cussegl federal
La regenza svizra consista da las set commembras e commembers dal Cussegl federal. La presidenta u il president da la Confederaziun è elegì mo per in onn e vala durant quest temp sco «primus inter pares», quai vul dir sco emprim tranter talas e tals da medema posiziun.