Il Departament federal da giustia e polizia (DFGP) s'occupa da temas sco la segirezza interna, l'asil u la migraziun. Manà vegn il departament dapi il schaner 2023 da Elisabeth Baume-Schneider.
Cussegliera federala Elisabeth Baume-Schneider
Elisabeth Baume-Schneider è naschida l'onn 1963 ed è creschida si a Les Bois (JU). Suenter la maturitad ha ella studegià sociologia, scienzas economicas e politologia a l'Universitad da Neuchâtel.
Ella ha lavurà en il sectur da la lavur sociala ed ha manà la Scola auta da lavur sociala e sanadad (HETSL) a Losanna. Ella è s'engaschada en differentas uniuns e fundaziuns. Elisabeth Baume-Schneider è maridada ed ha dus uffants creschids.
Elisabeth Baume-Schneider ha lavurà en differentas funcziuns per la PS dal chantun Giura. Ils onns 1995 fin 2002 è ella stada commembra dal Parlament chantunal, l'onn 2000 sco presidenta. Suenter sia elecziun en la Regenza chantunala l'onn 2003 è ella stada fin l'onn 2015 scheffa dal Departament d'educaziun, cultura e sport. Ils onns 2006, 2008 e 2012 è ella stada presidenta da la Regenza. Dapi la fin da l'onn 2019 ha ella represchentà il chantun Giura en il Cussegl dals chantuns.
Elecziun en il Cussegl federal
L'Assamblea federala ha elegì Elisabeth Baume-Schneider ils 7 da december 2022 en il Cussegl federal. Dapi il schaner 2023 maina ella il DFGP.
Departament federal da giustia e polizia (DFGP)
Il DFGP s'occupa da temas da la politica sociala sco la convivenza dals umans da differentas naziunalitads, las dumondas d'asil, la segirezza interna u il cumbat cunter la criminalitad. Ils fatgs dal stadi civil u las dumondas dal dretg da burgais tutgan medemamain tar las incumbensas dal DFGP sco la surveglianza davart il gieu da fortuna u sco l'elavuraziun da la basa e dals meds per la collavuraziun internaziunala da la giustia e da la polizia.
Cifras pertutgant il DFGP
Plazzas a temp cumplain (2021): 2719
Tenor il preventiv quinta il DFGP per l'onn 2021 cun custs da 2,62 milliardas francs.
Ultima midada 26.04.2023
