Il Departament federal per ambient, traffic, energia e communicaziun (DATEC)

Il Departament federal per ambient, traffic, energia e communicaziun (DATEC) è il departament da l'infrastructura e da l'ambient. Manà vegn el dapi il schaner 2023 da Albert Rösti.

Schef dal DATEC Albert Rösti.

Cusseglier federal Albert Rösti

Albert Rösti è naschì l'onn 1967 ed è creschì si a Kandersteg (BE). El ha frequentà il gimnasi a Thun e studegià agronomia a la SPF Turitg. L'onn 1997 ha el fatg il doctorat. Ils onns 2001 e 2002 ha el fatg in Master of Business Administration (MBA) a l'Universitad Rochester en ils Stadis Unids da l'America.

Lavurà ha Albert Rösti tranter auter sco magister per l'agricultura, sco secretari general da la Direcziun d'economia publica dal chantun Berna e sco directur dals producents svizzers da latg. A partir da l'onn 2013 ha el manà il «Biro dr. Rösti», che ha purschì cussegliaziuns per economia e politica. Ultra da quai ha el gì mandats en differents cussegls d'administraziun ed è stà activ en diversas federaziuns. Albert Rösti è maridà ed ha dus uffants creschids. 

Sia carriera politica ha Albert Rösti cumenzà l'onn 2008 en l'executiva dad Uetendorf (BE). A partir da l'onn 2014 è el stà president communal. L'onn 2011 è el vegnì elegì en il Cussegl naziunal. Ils onns 2016 fin 2020 è el stà president da la PPS Svizra. 

Elecziun en il Cussegl federal

L'Assamblea federala ha elegì Albert Rösti ils 7 da december 2022 en il Cussegl federal. Dapi il schaner 2023 maina el il DATEC. 

Il Departament federal per ambient, traffic, energia e communicaziun (DATEC)

Il DATEC s'occupa tant da l'infrastructura sco er da l'ambient. Pertutgant l'infrastructura sa tracti da las vias da traffic, da las raits da communicaziun e da las raits electricas. Il DATEC sto dentant er observar ils interess da l'ambient, da la sanadad e da la segirezza. Questa concentraziun d'interess utilitars e d'interess da protecziun en il medem departament maina savens a conflicts. Las decisiuns ston perquai vegnir preparadas fitg conscienziusamain.

Cifras pertutgant il DATEC

Plazzas a temp cumplain (2020): 2'378

Tenor il preventiv quinta il DATEC per l'onn 2020 cun custs da 12,76 milliardas francs.

 
 
 
 

Ultima midada 30.12.2022

Tar il cumenzament da la pagina

https://www.admin.ch/content/gov/rm/pagina-iniziala/departaments/departament-ambient-traffic-energia-communicaziun-datec.html