Stanza da sesidas dal Cussegl federal

Sin l'emprim plaun da la Chasa federala vest stattan a disposiziun al Cussegl federal quatter stanzas da sesidas e d'accoglientscha.

Stanza da sesidas dal Cussegl federal

Vista en la stanza da sesidas dal Cussegl federal.

La stanza da sesidas dal Cussegl federal è construida en il stil da la renaschientscha. Originals da l'onn 1857 èn anc il tschiel sura da stuc sco er il candelaber – in dals pli vegls candelabers da gas anc existents en la citad da Berna. Il tavlegià e il mobigliar dateschan da l'onn 1889. Qua han lieu las sesidas emnilas dal Cussegl federal.

Urden da seser

Davantvart entamez sesa la presidenta u il president da la Confederaziun. Da sia vart dretga sesa la chanceliera federala sco er in vicechancelier, da la vart sanestra sesa l'auter vicechancelier (pledader dal Cussegl federal). Ils pults da las sis cusseglieras federalas e cussegliers federals furman in mez rudè. Amez quest mez rudè sesan la vicepresidenta u il vicepresident e la cussegliera federala u il cusseglier federal ch'è il pli ditg en uffizi, a l'ur sesan quellas e quels ch'èn entrads sco ultims en uffizi.

Avantchombra

L'avantchombra cun il cheminé

En l'avantchombra tutga mo pli il cheminé tar l'equipament oriund da l'onn 1857. L'onn 1930 è l'avantchombra vegnida transfurmada ed ha survegnì in tavlegià d'art déco. Qua mangian e baivan las cusseglieras federalas ed ils cussegliers federals insatge pauc durant las pausas – sch'els fan insumma ina pausa. Er per ina marenda cuminaivla vegn l'avantchombra duvrada qua e là.

Le Salon de la présidence

Il Bureau de la présidence cun tapissarias e maletgs da Le Corbusier en il stil rococo.

Il Salon de la présidence, ch'è vegnì renovà l'onn 1889 en il stil baroc, è ina stanza d'audienza. Oz serva ella ad occurrenzas spezialas sco visitas da curtaschia, accreditaziuns d'ambassadurs e.u.v. Qua beneventa il Cussegl federal las novas collegas ed ils novs collegas elegids.

 

Le Bureau de la présidence

Il Bureau de la présidence en il stil rococo, cun tapissarias e maletgs da Le Corbusier

Il Bureau de la présidence cun tapissarias e maletgs da Le Corbusier sa preschenta en il stil rococo. Oz è el ina segunda stanza da sesidas. En il Bureau du Président han lieu ils inscunters dal Cussegl federal cun il president dal Directori da la Banca naziunala svizra u cun la presidenta dal cussegl d'administraziun da l'Autoritad federala per la surveglianza dals martgads da finanzas FINMA.

 

Ultima midada 08.03.2024

Tar il cumenzament da la pagina

https://www.admin.ch/content/gov/rm/pagina-iniziala/cussegl-federal/nua-lavura-la-regenza/stanza-da-sesidas.html