Ils liberaldemocrats èn stads cleramain ils victurs da las emprimas elecziuns dal parlament. Quai è er sa mussà tar il resultat da l'emprima elecziun dal Cussegl federal l'onn 1848. La Svizra è sa sviluppada pir cun l'ir dal temp ad ina democrazia da concordanza che integrescha las differentas forzas da las partidas politicas en la regenza.
Lunga dominanza dals liberaldemocrats
La Svizra n'ha betg adina gì ina regenza da pliras partidas sco ozendi. Suenter la fundaziun dal stadi federal l'onn 1848 han ils liberals regnà per 43 onns sulets.
L'onn 1943 èn per l'emprima giada stadas represchentadas tut las partidas grondas
L'onn 1891 è entrà l'emprim commember dals catolic-conservativs (la PCD dad oz) en la regenza. In segund è suandà l'onn 1919. Dals onns 1917-1919 seseva in liberalconservativ en il Cussegl federal. L'onn 1929 ha l'Assamblea federala elegì in commember da la Partida da purs, mastergnants e burgais (la PPS dad oz) en il Cussegl federal. Durant la Segunda Guerra mundiala èn vegnids integrads l'onn 1943 en la regenza er ils socialdemocrats.
La furmla magica e sia fin
L'onn 1959 èn questas quatter partidas (PLD, PCD, PSS e PPS) sa cunvegnidas da furmar ina regenza cun dus liberals, dus cristiandemocrats, dus socialdemocrats ed in represchentant da la PPS (l'uschenumnada «furmla magica» 2:2:2:1). Questa repartiziun ha durà 44 onns, fin che la PPS ha gudagnà l'onn 2003 in sez dapli a cust da la PCD. L'onn 2008 han sia cussegliera federala Eveline Widmer-Schlumpf e ses cusseglier federal Samuel Schmid dentant midà en la novfundada Partida burgais-democratica (PBD). Suenter la retratga da Samuel Schmid è la PPS puspè represchentada dapi il 2009 cun in cusseglier federal, Ueli Maurer. Dapi lura è la furmla 2:2:1:1:1 (2 PS, 2 PLD, 1 PCD, 1 PBD, 1 PPS). Dapi che la furmla magica è vegnida schliada, vegnan manadas discussiuns davart la cumposiziun correcta da la regenza svizra en quai che reguarda las partidas.
Ultima midada 15.09.2017
