Passa tschient cusseglieras federalas e cussegliers federals han elegì l'Assamblea federala plenara dapi l'onn 1848. In sguard en l'istorgia mussa ch'igl ha dà bleras lungas duradas d'uffizi e be paucas reelecziuns che n’èn betg reussidas.
Durada d'uffizi e demissiun
Las cusseglieras federalas ed ils cussegliers federals restan en media var 10 onns en uffizi. La durada d'uffizi la pli lunga hai dà il 19avel tschientaner. Carl Schenk è stà 32 onns cusseglier federal. Er fitg ditg è per exempel Giuseppe Motta stà en il Cussegl federal. Durant il temp da las duas guerras mundialas è el stà 28 onns en uffizi. Da l'ultim temp pon vegnir menziunads ils 15 onns d'uffizi da Furgler, Delamuraz, Villiger e Leuenberger. Ina limitaziun da la durada d'uffizi u in votum da disfidanza na datti betg. La commembra u il commember dal Cussegl federal en uffizi determinescha pia sez il mument da sia demissiun. Mintgatant succeda quella però sin squitsch da la partida u dal parlament. Nunreelecziuns da cusseglieras federalas e cussegliers federals en uffizi datti fitg darar. Dapi l'onn 1848 è quai capità quatter giadas (Ulrich Ochsenbein 1854, Jean-Jacques Challet-Venel 1872, Ruth Metzler 2003, Christoph Blocher 2007).
Cussegliers federals che n'han betg acceptà l'elecziun
Mintgatant èn persunas bain vegnidas elegidas en il Cussegl federal, ma n'han betg acceptà questa elecziun. L'exempel il pli giuven è stà Francis Matthey che ha refusà sia elecziun a favur da la segunda dunna en il Cussegl federal (Ruth Dreifuss).
Vesair anc ina giada las elecziuns dal Cussegl federal passadas?
L'organisaziun da l'elecziun dal Cussegl federal è chaussa dal parlament, las registraziuns sin video da questas elecziuns ed ils protocols verbals pon vegnir consultads sin parlament.ch
Dumondas davart l'elecziun dal Cussegl federal?
Il parlament fa ina glista da las dumondas las pli frequentas e da las respostas davart las reglas da l'elecziun dal Cussegl federal.
Ultima midada 15.11.2018
