Dunnas en il Cussegl federal

Ils 22 da settember 2010, cur che Simonetta Sommaruga è vegnida elegida en il Cussegl federal, è quel stà dominà per l'emprima giada da las dunnas cun 4 cusseglieras federalas e 3 cussegliers federals. Questa situaziun ha durà fin a la demissiun da Micheline Calmy-Rey l'onn 2011. In simbol suenter in lung temp da spetga.

Las cusseglieras federalas dapi l'onn 1984

Maioritad da dunnas en il Cussegl federal. Cun l'elecziun da Simonetta Sommaruga 2010 sesan per l'emprima giada quatter dunnas en il Cussegl federal. Da sanestra, presidenta da la Confederaziun Doris Leuthard, Micheline Calmy-Rey, Eveline Widmer-Schlumpf, Ueli Maurer, Didier Burkhalter, Simonetta Sommaruga e Johann Schneider-Ammann, sco er la chanceliera federala Corina Casanova. (KEYSTONE/Peter Schneider)

L'onn 1984: L'emprima dunna

Las dunnas svizras han stuì spetgar fin a l'elecziun dad Elisabeth Kopp l'onn 1984, fin ch'ellas èn stadas represchentadas al timun da la Svizra. Suenter avair survegnì il dretg da votar e d'eleger l'onn 1971 han ellas stuì avair pazienza anc 13 onns, fin ch'ina dad ellas è vegnida acceptada en la regenza federala.

Elecziun da l’emprima dunna sco cussegliera federala: Accumpagnada da dus salters auza Elisabeth Kopp ils 2 d'october 1984 ses maun dretg per far l'engirament a chaschun da sia saramentaziun en la sala dal Cussegl naziunal. (KEYSTONE/str)

La successiun

Actualmain fan 3 dunnas part dal Cussegl federal: Simonetta Sommaruga (elegida l'onn 2010), Viola Amherd (del 2019) ed Karin Keller-Sutter (del 2019).

Ultra da las politicras menziunadas qua survart han anc Ruth Dreifuss (1993-2002, l'emprima presidenta da la Confederaziun l'onn 1999) e Ruth Metzler-Arnold (1999-2003), Micheline Calmy-Rey (2003-2011, presidenta da la Confederaziun l'onn 2007 ed 2011), Eveline Widmer-Schlumpf (2007-2015, presidenta da la Confederaziun l'onn 2012), Doris Leuthard (2006-2018,  presidenta da la Confederaziun l'onn 2010 ed 2017), occupà in sez en il Cussegl federal. Pia hai dà fin ussa 9 cusseglieras federalas.

 

 

Ultima midada 27.12.2018