Regiuns en il Cussegl federal dapi l'onn 1848

Almain ina persuna da la Svizra franzosa e dal Tessin u duas persunas da la Svizra franzosa èn praticamain adina stadas commembras dal Cussegl federal. La cultura da consens da la Svizra correspunda a la persvasiun che decisiuns èn mo duraivlas, sch'ellas na vegnan betg mo purtadas da la maioritad, mabain er acceptadas da las minoritads. Perquai derivan las set commembras e commembers dal Cussegl federal da differents chantuns, da differentas regiuns linguisticas e da differentas partidas.

Il Tessinais Flavio Cotti (president da la Confederaziun) e la Genevrina Ruth Dreifuss (vicepresidenta) sin la via ad ina sesida da clausura l'onn 1998 en il Tessin.
Il Tessinais Flavio Cotti (president da la Confederaziun) e la Genevrina Ruth Dreifuss (vicepresidenta) sin la via ad ina sesida da clausura l'onn 1998 en il Tessin. (KEYSTONE/Karl Mathis)

Chantuns – ina represchentanza equilibrada

Maximalmain ina cussegliera federala u in cusseglier federal per chantun. Quai ha prescrit la Constituziun federala il cumenzament dal stadi federal. Ina dominanza dals chantuns gronds dueva vegnir impedida uschia. Tgi che appartegneva a tge chantun era reglà ditg sin basa dal chantun d'origin, pli tard sin basa dal chantun da domicil u dal chantun da l'anteriura activitad guvernativa. Dapi l'onn 1999 è la regla formulada en ina moda pli averta en la Constituziun: I "sto vegnir procurà che las regiuns dal pajais e las regiuns linguisticas vegnian represchentadas adequatamain".

Regiuns linguisticas – regla 5 : 2

Ina represchentanza equilibrada da las regiuns linguisticas en il Cussegl federal è stada gia dal cumenzament dal stadi federal ennà da gronda impurtanza. Schebain che quai n'è betg prescrit per lescha, sesevan gia en l'emprim Cussegl federal dus represchentants da la Svizra "latina". Da la relaziun 5 a 2 è vegnì devià mo darar e mo temporarmain. Dapi l'onn 1999 regla la disposiziun constituziunala ultra da la represchentanza regiunala er la represchentanza da las regiuns linguisticas. Las regiuns linguisticas ston esser represchentadas adequatamain. La Svizra franzosa ha gì trasora in cusseglier federal dapi l'onn 1848. La Svizra taliana n'è percunter betg stada represchentada permanentamain en il Cussegl federal. Ses ultim represchentant è stà Flavio Cotti (1987-1999).

Basa legala: Art. 175 Cst. "Cumposiziun"

La represchentanza en il Cussegl federal tenor partidas

  • Ils chantuns gronds Turitg, Berna e Vad èn quasi adina stads represchentads en la regenza. I dat però er chantuns che n'han anc mai gì ina cussegliera federala u in cusseglier federal: Schaffusa, Uri, Sviz, Sutsilvania e Giura.
  • La colliaziun regiunala dal Cussegl federal ha survegnì l'onn 2010 ina nova furma d'expressiun. Dapi quel onn fa il Cussegl federal per onn ina u duas da sias sesidas en in chantun, pia "extra muros".

Ultima midada 14.09.2017

Tar il cumenzament da la pagina

https://www.admin.ch/content/gov/rm/pagina-iniziala/cussegl-federal/istorgia-dal-cussegl-federal/chantuns-e-linguas-en-il-cussegl-federal.html