Guvernar è dapli che mo agir en moda prospectiva e controllar

La planisaziun strategica e la valitaziun da la situaziun han ina gronda impurtanza per il Cussegl federal. El controllescha er, sche las incumbensas èn vegnidas ademplidas e sche las finamiras èn vegnidas cuntanschidas. 

Ils 3 da settember 2014 en il Center da medias da la Confederaziun: Il cusseglier federal Ueli Maurer discurra cun schurnalists davart l'ulteriur svilup da l'armada.
Ils 3 da settember 2014 en il Center da medias da la Confederaziun: Il cusseglier federal Ueli Maurer discurra cun schurnalists davart l'ulteriur svilup da l'armada. (KEYSTONE/Peter Schneider)

Sa fatschentar cun l'avegnir da la Svizra e prender las dretgas decisiuns – quai è ina incumbensa centrala da la politica guvernamentala. En quest connex sto il Cussegl federal ademplir a medem temp duas pretensiuns fitg differentas:

  • El sviluppa strategias e planisaziuns che duain nizzegiar las schanzas da las midadas socialas, tecnicas ed economicas per la Svizra e limitar las ristgas.
  • El sto dentant er tegnair liber ils mauns per pudair vegnir a fin uschè bain sco pussaivel cun eveniments e svilups nunspetgads u novs.

Plirs instruments da planisaziun

Instruments che gidan il Cussegl federal a far ina planisaziun prospectiva èn la planisaziun da la legislatura, las finamiras da l'onn sco er la planisaziun da las finanzas ed il preventiv. Els mussan, co ch'il Cussegl federal vul realisar las incumbensas dal pievel e dal parlament sin basa da la Constituziun e da las leschas. Vitiers vegnan strategias sco la strategia per in svilup duraivel. Sin fundament da questas directivas planiseschan ils departaments lur activitads.

Vegnan cuntanschidas las finamiras?

Per cuntanscher las finamiras surdat il Cussegl federal incaricas a l'administraziun federala. El controllescha regularmain, sche questas incaricas vegnan exequidas e sche las finamiras vegnan cuntanschidas. En il rapport da gestiun per mauns dal parlament mussa el, sche las finamiras èn vegnidas cuntanschidas. El motivescha er divergenzas da las finamiras da l'onn e declera projects nunplanisads. 

Planisaziun politica

L'intent da la planisaziun politica dal Cussegl federal sa lascha resumar en quatter puncts:

  • sviluppar vinavant la politica federala en moda prospectiva
  • manar l'activitad administrativa cun cleras directivas
  • infurmar a temp il parlament davart la gestiun
  • infurmar la publicitad davart las intenziuns politicas.

La politica federala vegn planisada en quatter pass:

  1. Cun agid d'ina analisa dals conturns vegnan identifitgadas las sfidas las pli impurtantas per ina perioda da legislatura. Questa analisa è la basa per planisar la legislatura.
  2. En il rapport davart la planisaziun da la legislatura vegnan descrittas las finamiras e las mesiras las pli impurtantas per ils 4 onns respectivs.
  3. Las finamiras da l'onn concretiseschan, co che las finamiras da la legislatura duain vegnir cuntanschidas e co che sfidas actualas supplementaras duain vegnir dumagnadas.

Il rapport da gestiun annual serva a dar pled e fatg envers il parlament, ed el infurmescha, quant enavant che las finamiras èn vegnidas cuntanschidas. 

Ultima midada 08.12.2015

Tar il cumenzament da la pagina

https://www.admin.ch/content/gov/rm/pagina-iniziala/cussegl-federal/incumbensas/prevesair.html